ह्वाइट हाउसका प्रेस सचिव शन स्पाइसरले राजीनामा दिए

७ साउन – अमेरिकी राष्ट्रपति कार्यालय ह्वाइट हाउसका प्रेस सचिव अर्थात प्रवक्ता शन स्पाइसरले राजीनामा दिएका छन् । राष्ट्रपति डोनाल्ड ट्रम्पले नयाँ कम्युनिकेसन निर्देशक नियुक्त गरेपछि बेखुशी रहेका स्पाइसरले त्यसकै विरोधमा प्रवक्ताबाट राजीनामा दिएका अमेरिकी सञ्चारमाध्यमले उल्लेख गरेका छन् । स्पाइसरको ठाउँमा अब एन्टोनी स्कारामुर्चीले ह्वाइट हाउस प्रवक्ताको जिम्मेवारी सम्हाल्ने भएका छन् । डोनाल्ड ट्रम्पले राष्ट्रपतिको जिम्मेवारी सम्हालेदेखि नै स्पाइसरको ह्वाइट हाउसमा हुने पत्रकार सम्मेलन निकै चर्चामा रहने गरेको थियो । स्पाइसरले बोलेका धेरै कुरा व्यंग्यात्मक रुपले प्रस्तुत गर्न सकिने खालका बन्ने गरेका थिए ।

ट्रम्पले स्कारामुर्चीलाई कम्युनिकेसन निर्देशकमा नियुक्त गरेपछि स्पाइसरले त्यसको विरोध जनाएको र त्यसैको फलस्वरुप राजीनामा दिएको अमेरिकी पत्रिका न्युयोर्क टाइम्सले दाबी गरेको छ ।