बाढी पहिरोमा परी मृत्यु हुनेको संख्या १०७ पुग्यो

३१ जेठ – दक्षिणपूर्वी बंगालादेशमा तीव्र मनसुनी वर्षाका कारण विभिन्न भागमा बाढीपहिरो जाँदा मृत्यु हुनेहरूको संख्या १०७ पुगेको छ । बीबीसीका अनुसार मृत्यु हुनेमा पाँच जना सैनिकसमेत छन् । यसअघि ३५ जनाको मात्र मृत्यु भएको समाचार बाहिर आएको थियो । रंगमती जिल्ला प्रशासनका प्रवक्ताले तीव्र मनसुनी वर्षाले जिल्लाका विभिन्न ठाउँमा पहिरो गएको र रंगमती जिल्लामा मात्रै कम्तीमा ६० जनाको मृत्यु भएको बताएका छन् ।

खराब मौसमका कारण राहत कार्यसमेत प्रभावित भएको छ । यी क्षेत्रमा दूरसञ्चार सम्पर्क विच्छेद भएको छ भने बिजुली बन्द भएकाले स्थानीय जनतासँग सम्पर्क हुन सकेको छैन । दैवीप्रकोप प्रबन्धन विभागका प्रमुख रियाज अहमदले एएफपीसँग भनेका छन्, ‘‘हामी अझै पनि भूस्खलनबाट प्रभावित कतिपय ठाउँमा जान सकेका छैनौं । पानी बन्द भएपछि हानी नोक्सानीको वास्तविक चित्र स्पष्ट हुनेछ र राहत कार्य जोडतोडका साथ सुरु हुनेछ ।’’

रंगमती जिल्ला भारत बंगालादेशको सीमा नजिकै पर्ने पहाडी इलाका हो, जहाँ भूस्खलनका कारण थुप्रै घर माटोमुनि पुरिएका छन् । पहिरो जाने बेला थुप्रै मानिसहरू आफ्नो घरभित्र सुतिरहेको बताइन्छ । सेनाका प्रवक्ताले एएफपीलाई बताएअनुसार जुन जुन सैनिकको मृत्यु भयो, उनीहरू पहिले आएको पहिरो हटाएर सडक जाम खुलाउने काममा लागेका थिए ।

बंगालादेशमा सोमबार बिहानबाट भएको तीव्र वर्षाले रंगामती र बन्दरबन दुई जिल्ला निकै प्रभावित बनेका थिए । मृतकहरूको संख्या पनि यिनै दुई जिल्लामा बढी रहेको छ । भीषणरूपमा परेको मनसुनी वर्षाले रंगामतीमा १३.५ इन्चसम्म पानी जमेको र अझै पनि पानी पर्ने क्रम नरोकिएको प्राप्त समाचारमा जनाइएको छ ।
वर्षाका कारण राजधानी ढाका र व्यापारिक नगर चटगाउँसमेत प्रभावित भएका छन् ।