एभरग्रीन वर्ल्डवाइड इन्टरटेन्मेन्टको १२औँ वार्षिकोत्सव भव्यरुपमा सम्पन्न

काठमाडौं- एभरग्रीन वर्ल्डवाइड इन्टरटेन्मेन्टले ‘कर्म अनुसार आ–आफ्नो पहिचान, विभिन्न व्यक्तिहरूलाई सम्मान’ भन्ने नारासहित आफ्नो १२औँ वार्षिकोत्सव भव्यताका साथ मनाएको छ। सोमबार, चलचित्र विकास बोर्डको सभा हलमा सम्पन्न यस विशेष समारोहमा विभिन्न क्षेत्रमा योगदान पुर्‍याएका कलाकार, समाजसेवी, तथा पत्रकारहरूलाई सम्मान गरिएको थियो। अभिनेता शिव श्रेष्ठको प्रमुख आतिथ्यमा सम्पन्न यो कार्यक्रममा अन्य प्रमुख व्यक्तित्वहरू समेत सहभागी भएका थिए, जसमा नृत्य निर्देशक राजु शाह, अभिनेता तथा निर्देशक नवल खड्का, चलचित्र कलाकार सङ्घका अध्यक्ष मोहन निरौला, तथा चलचित्र विकास बोर्डका अध्यक्ष दिनेश डिसी विशिष्ट अतिथिको रूपमा उपस्थित थिए।

कार्यक्रमको मनोरञ्जक पक्षलाई थप बलियो बनाउन वरिष्ठ अभिनेता शिव श्रेष्ठको सम्मानमा अभिनेता गजित विष्टसहित कलाकारहरूको टोलीले श्रेष्ठ अभिनीत चलचित्रका लोकप्रिय गीतमा आकर्षक नृत्य प्रस्तुति गरेका थिए। यसले कार्यक्रममा रमाइलो र उत्साह थपेको थियो। यो कार्यक्रममा नेपालका चर्चित कोरियोग्राफर गम्भीर विष्ट, हास्य कलाकार राजाराम पौडेल, अभिनेता शिवहरि नेपाल, रामचन्द्र अधिकारी, उत्तम केसी, तथा अन्य विभिन्न क्षेत्रमा योगदान पुर्‍याएका व्यक्तित्वहरूलाई कदर पत्रसहित सम्मानित गरिएको थियो। सम्मानित हुनेहरूमध्ये दन्त चिकित्सक डा. सुवास घिमिरे, बाल रोग विशेषज्ञ डा. रामानन्द चौधरी, गायक पवित्र श्रेष्ठ, भाषाविद् तथा लेखक तेज बहादुर प्रधान, सङ्गीतकार विनोद ढकाल, र पत्रकार नन्दलाल खरेलजस्ता प्रतिष्ठित नामहरू रहेका थिए।

कार्यक्रममा चलचित्र ‘छक्का पञ्जा–३’ का निर्देशक तथा अभिनेत्री दिपाश्री निरौलालाई उत्कृष्ट फिल्म निर्देशकको रूपमा कदर पत्रसहित सम्मान गरिएको थियो। यसै गरी, पत्रकार विष्णु प्रसाद सुबेदी, लोक गायक सफल श्रेष्ठ, निर्देशक दिल बहादुर तामाङ, अभिनेत्री आशा भुसाल, हास्य कलाकार सुरेश तिमल्सिना लगायतका व्यक्तिहरू पनि सम्मानित हुनेमा थिए। सांस्कृतिक प्रस्तुतिको रूपमा पञ्चे बाजासहित विभिन्न नृत्य र सङ्गीत कार्यक्रमले दर्शकहरूलाई मन्त्रमुग्ध बनाएको थियो। विगत १२ वर्षदेखि एभरग्रीन वर्ल्डवाइड इन्टरटेन्मेन्टले कलाकार, समाजसेवी, पत्रकार तथा विभिन्न विधामा योगदान पुर्‍याउने प्रतिभाहरूलाई सम्मान गर्दै आएको छ।