वासिङ्टन डिसी-अमेरिकाको राष्ट्रपति निर्वाचित डोनाल्ड ट्रम्पले मेक्सिको खाडीको नाम फेर्ने बताएका छन् ।  उनले मंगलबार मेक्सिको खाडीको नाम फेरेर अमेरिकाको खाडी राख्ने अभिव्यक्ति दिएका हुन् । पश्चिमी गोलार्द्धको नक्सा पुनः कोर्ने यो उनको पछिल्लो संकेत हो । ट्रम्पले बारम्बार क्यानडालाई अमेरिकाको ५१ औँ राज्य भनिरहेका छन् । डेनमार्कले पनि ग्रिनल्यान्ड बेच्नेबारे सोच्नु पर्नेमा जोड दिइरहेका छन् । पानामालाई पनि पानामा क्यानल अमेरिकालाई फिर्ता गर्न भनिरहेका छन् ।

सन् २०१६ मा पहिलो पटक राष्ट्रपतिको पदका लागि उम्मेदवारी दिएयता नै मेक्सिकोसँग सीमा सुरक्षा र मेक्सिकोबाट आयातित वस्तुमा अतिरिक्त महसुल लगाउनेसम्म कयौँ कुरालाई लिएर ट्रम्पको खटपट भएको थियो । पहिलो कार्यकालमा ट्रम्पले मेक्सिकोसँगको सीमामा अग्लो पर्खाल लगाउने घोषणा नै गरेका थिए । तर सिनेटबाट सोका लागि बजेट भने पारित गर्न सकेनन् । मेक्सिकोको खाडीलाई अमेरिकाको तेस्रो तट भनिन्छ । यो दक्षिणपूर्वी अमेरिका पाँच राज्य भएर गएको छ । मेक्सिकोले भने यसलाई एल गोल्फो दि मेक्सिको भन्छ ।