लोक दोहोरी स्टार’ सिजन १ को उपाधि निशा लामालाई 

काठमाडौँ – नेपाली सांगीतिक रियालिटी सो ‘लोक दोहोरी स्टार’ सिजन १ को उपाधि  गायिका निशा लामाले जितेकी छन्। राजधानीमा भव्य रूपमा सम्पन्न ग्रान्ड फिनाले कार्यक्रममा उनले उत्कृष्ट प्रस्तुति दिंदै नगद १० लाख रुपैयाँसहित उपाधि आफ्नो नाममा सुरक्षित गर्न सफल भइन्।

प्रतियोगितामा कडा प्रतिस्पर्धा गर्दै मानव रावत क्षेत्री दोस्रो स्थानमा सीमित भए भने लीलबहादुर थापा मगर तेस्रो स्थान हासिल गर्न सफल भए। फिनालेमा पुगेका टप ८ फाइनलिस्टहरूले आफ्नो गायन प्रतिभा प्रस्तुत गर्दै दर्शक र निर्णायकहरूको मन जितेका थिए। उनीहरूको प्रस्तुति दर्शकका लागि मनोरञ्जन मात्र नभई सांगीतिक स्तरको उत्कृष्ट झल्को समेत बनेको थियो।

एभेन्टोज नेपाल र एभेन्टोज डिजिटलको संयुक्त आयोजनामा सम्पन्न यस रियालिटी सोले नेपाली लोक दोहोरी संगीतको प्रवर्द्धनमा महत्वपूर्ण योगदान पुर्‍याएको छ। कार्यक्रमको निर्देशन चर्चित निर्देशक माधवराज खरेलले गरेका थिए, जसले शोलाई व्यवस्थित र आकर्षक ढंगले प्रस्तुत गर्न महत्वपूर्ण भूमिका निर्वाह गरेका छन्।

आयोजक समितिका प्रमुख तथा निर्माता डेविल सिंह राजपुत, यादव बहादुर थापा र परमानन्द चौधरीको नेतृत्वमा कार्यक्रम सफलतापूर्वक सम्पन्न भएको हो। कार्यक्रमको व्यवस्थापनको जिम्मेवारी शैलेश नेपालीले सम्हालेका थिए, जसले सम्पूर्ण व्यवस्थापनलाई प्रभावकारी रूपमा सञ्चालन गरेका थिए।

ग्रान्ड फिनालेमा निर्णायकको भूमिकामा रीता थापामगर, राजु ढकाल, चन्द्र शर्मा र अमृत खाती रहेका थिए। उनीहरूले प्रतियोगीहरूको प्रस्तुति मूल्यांकन गर्दै निष्पक्ष निर्णय दिएका थिए। कार्यक्रमको सञ्चालन रोजिन शाक्य र मुना अर्यालले गरेका थिए, जसले आफ्नो प्रस्तुति शैलीमार्फत कार्यक्रमलाई थप आकर्षक बनाएका थिए।

‘लोक दोहोरी स्टार’ सिजन १ को सफल समापनसँगै नेपाली लोक दोहोरी संगीत क्षेत्रमा नयाँ प्रतिभाहरूको उदय भएको छ। यस प्रतियोगिताले भावी दिनमा अझै धेरै प्रतिभाशाली कलाकारहरूलाई राष्ट्रिय स्तरमा चिनाउने अपेक्षा गरिएको छ।