एमसीसी सम्झौताको व्याख्यात्मक टिप्पणी न्यानो थाङ्नाबाहेक केही पनि होइन : खनाल

मोरङ — नेकपा (एकीकृत समाजवादी) का नेता एवं पूर्वप्रधानमन्त्री झलनाथ खनालले एमसीसी सम्झौताले नेपालीको भाग्य र भविष्यमा दूरगामी असर पार्ने भएकाले आफूहरुले नमान्ने बताएका छन् । विराटनगरमा बुधबार पत्रकारसँगको कुराकानीमा खनालले सदनमा प्रक्रियामा नै नलगी हतारहतार अनुमोदन गरिएकोले यसको परिणामहरु देखिँदै जाने बताएका हुन् । ‘एमसीसीले नेपाली समाजमा विभाजन ल्याएको छ यी, यस्ता अझै परिणामहरु देखिँदै जान्छ,’ उनले भने, ‘एमसीसीले नेपालीको भाग्य र भविष्यमा दूरगामी असर पार्छ र व्याख्यात्मक टिप्पणी न्यानो थाङ्नाबाहेक केही पनि होइन र यसको कानुनी आधार केही पनि छैन ।’

खनालले एमसीसीमा अनेकौं राष्ट्रघाती कुराहरु भएकाले आफूहरु नमान्ने भनाइ दोहोर्‍याए । ‘व्याख्यात्मक टिप्पणीको प्रस्ताव र एमसीसी सम्झौता छुट्टाछुट्टै पारित हुनुपर्ने थियो तर त्यस्तो गरिएन,’ उनले भने, ‘संसद्‌को विधि विधानविपरीत एमसीसी पास भयो त्यसैले कार्यान्वयनमा भयानक चुनौती छ र हामीहरु मान्दैनौं ।’

एमसीसी सत्ता टिकाउनलाई हतारहतार पास गरिएको उनको भनाइ थियो । खनालले निलम्बित प्रधानन्यायाधीश चोलेन्द्रशमशेर जबराविरुद्धको महाभियोग प्रस्ताव विस्तारै सदनमा अघि बढ्ने विश्वास व्यक्त गरे ।