Thursday 25th April 2024

    फान अवार्डको तेश्रो संस्करण असार तेश्रो साता हुदै    चौथो हिमालयन अन्तर्राष्ट्रिय अवार्ड २०८० का उत्कृष्ट पाँच सार्वजनिक    यूएईमा राष्ट्रिय लोक सांस्कृतिक संघको साँस्कृतिक कार्यक्रम भव्यरुपमा सम्पन्न    नेपालमै अब अन्तर्राष्ट्रियस्तरको जिम ट्रेनर प्रशिक्षण    मिष्टर एण्ड मिस नेशनलमा भिड्दै डा. आयुष्नोभा

नाममा आपत्ति जनाउँदै सेन्सर बोर्डले रोक्यो फिल्म ‘रंगेली’

Friday, March 1, 2024 National Power

काठमाडौं – केन्द्रीय चलचित्र जाँच समिति (सेन्सर बोर्ड) ले फिल्म ‘रंगेली’को शीर्षकमा आपत्ति जनाउँदै सेन्सर पासको प्रमाणपत्र दिन अस्वीकार गरेको छ । यस विषयमा नेशनल पावर न्युजलाई बताए अनुसार  समितिमा गृह मन्त्रालयको प्रतिनिधित्व गर्ने सेन्सर बोर्डका एक सदस्यले शीर्षकको संवेदनशीलतालाई लिएर आफूहरुले यस्तो कदम लिएको बताए ।

‘रंगेली नगरपालिकामा फिल्म खिचेकाले स्थानीय सरकारको सहमति छ कि छैन भनेर हामीले बुझ्न खोजेका हौं । यसबारे हामी छलफलकै क्रममा छौं । छायांकन भएको थलोको सहमति पत्र ल्याएपछि मात्र उहाँहरुले प्रमाणपत्र पाउनुहुन्छ,’ उनले भने ।

उनले फिल्मको विषयवस्तु र गुणस्तरभन्दा पनि शीर्षकप्रति आफूहरुको चासो रहेको बताए । सेन्सर बोर्डका अर्का सदस्य ऋषिराज आचार्यले ठाउँको संवेदनशीलतालाई लिएर आफूहरुले कन्सेन्ट पेपर खोजेको बताए ।

‘उहाँहरुले सहमति गर्नुभएको होला । सुटिङको लागि उहाँहरुले लिनुभएको अनुमति पत्र हामीलाई पेश गर्नुपर्छ । हाम्रो यो चासो उहाँहरुकै हितको लागि हो,’ आचार्यले भने, ‘फिल्म राम्रै सन्देश दिने तरिकाले बनेको छ भने प्रश्न हुँदैन । तर नराम्रो तरिकाले चित्रण गरिएको छ भने सम्बन्धित ठाउँको छविमा असर पर्नसक्छ ।’

फिल्मका निर्माता जितेन्द्र खतिवडाले आफूहरुले यो समस्या समाधान हुने आशा लिइएको बताए । सेन्सर बोर्डले केही दृश्य र संवाद मिलाएर आउनु भनेको खतिवडाको भनाइ छ । अर्जुन सुवेदी निर्देशित ग्याङस्टर फिल्म ‘रंगेली’ फागुन २५ मा प्रदर्शन हुँदैछ । सुरुमा फिल्मको ‘ग्याङस्टर रंगेली’ राखिएपनि पछि नाम परिवर्तन गरेर ‘रंगेली’मा राखिएको थियो ।