एमाले ब्युँतिए ओली नै प्रधानमन्त्री

काठमाडौं- प्रधानमन्त्री केपी शर्मा ओलीको नेकपा एमाले ब्युँताउने चाहना विगतमा नै देखिएको हो । नेकपाभित्र विवाद चर्कँदै जाँदा ओली निकटस्थले नेकपा एमाले निर्वाचन आयोगमा दर्ता गराएका थिए ।

अहिले ऋषि कट्टेलले नेकपा नाम जुधेकोबारे निर्वाचन आयोगविरुद्ध दायर मुद्दामा फैसला आउँदैछ । २० फागुनमा यसउपर फैसला आउन लागेको छ । कट्टेलको पक्षमा फैसला आएमा नेकपा एमाले र माओवादी केन्द्र ब्युँतन सक्छ । यस्तो अवस्थाको चाहना स्वयं ओलीले पनि राखेको संकेतहरु मिल्न थालेको छ ।

ओलीले प्रचण्ड र नेपालले लड्डु खाएकोमा के पाउन खाएका हुन् ? भनी व्यङ्ग्य गरिसकेका छन् । उनी बरु नेकपा एमाले ब्युँताएर सत्ता जोगाउने र अन्य दललाई समिकरणमा ल्याउन खोजिरहेका छन् ।

नेकपा एमाले ब्युँतिएमा ओलीको पक्षमा एक सयभन्दा बढी सांसद संख्या हुनसक्छ । पूर्व एमालेहरु सुर्य चिन्हबाट चुनाव लडेकाले वाध्यात्मक अवस्थाबीच उनीसँग आउनुपर्ने हुनसक्छ । स्वयं माधवकुमार नेपाल र झलनाथ खनाल पनि अप्ठ्यारोमा पर्न सक्छन् । ओली यही चाहिरहेको बुझ्न सकिन्छ ।

नेकपा एमाले ब्युँतिएमा ओली संसदीय दलमा भारी बहुमतमा रहन सक्छन् । त्यतिबेला उनको सत्ता समिकरण जनता समाजवादी पार्टीसँग पनि हुनसक्छ । काँग्रेससँग पनि हुने सम्भावना छ । तर, काँग्रेसलाई सत्तामा जान दलभित्र रोकटोक हुनसक्छ ।

एमाले र माओवादी रहँदाको सांसद संख्याको अंकगणित हेर्दा एमाले जसपासँग समिकरण गरेर सरकारको नेतृत्वमा जानसक्छ । या अल्पमतको पहिलो पार्टी भएकाले एमालेले नै सरकारको नेतृत्व गर्न सक्छ । काँग्रेस प्रमुख प्रतिपक्षी दलमै रहन पुग्छ ।

एमालेबाहेकको दलहरुले सरकार बनाउने हो भने काँग्रेस, माओवादी केन्द्र र जनता समाजवादी पार्टी तीनैवटा मिल्नुपर्ने हुन्छ । यसले राजनीति झन् जटिल बनाउनसक्छ ।