Thursday 28th March 2024

    चितवनमा बिभिन्न मनोरञ्जनात्मक कार्यक्रम सहित ‘होली विशेष २०८०’भव्यरुपमा सम्पन्न    सन्तोषको स्वरमा ‘हे मातृभूमि तिम्रा हामी सबै पुजारी …’ (भिडियोसहित)    ‘जुनियर मिस्टर एण्ड मिस इटहरी’को दोश्रो संस्करणको उपाधि विजेता बने बस्नेत र लुइँटेल    उपप्रधानमन्त्री लामिछानेले भने, ‘महाजात्रा हेरिरहँदा ऊर्जा महसुस गरेँ’    ११ औं म्यूजिक खबर म्यूजिक अवार्डको मनोनयन सार्वजनिक

कीर्तिमानी गीतकार डा. उपाध्यायका पुनः सात गीति एल्बम सार्वजनिक

Tuesday, November 12, 2019 National Power

काठमाडौं- गत मंसिरमा एकसाथ सात गीति एल्बम सार्वजनिक गरेर विश्व रेकर्ड राखेका विश्वकीर्तिमानी गीतकार डा. डीआर उपाध्यायका पुनः सात एल्बम सार्वजनिक गरिएको छ । राजधानीको कमलपोखरी स्थित रसियन साँस्कृतिक केन्द्रमा सोमबार एक विशेष कार्यक्रमबीच डा. उपाध्यायका सात गीति एल्बम ‘अन्जान तिर्खा’, ‘सुधारस’, स्वर्गघर, ‘नजरको तीर’, ‘सेभेन्थ कड्स’, ‘सौभाग्यको सिन्दुर’ र ‘अनुभुतिको मझेरीमा’ सार्वजनिक गरिएको हो । कार्यक्रममा बाङ्मय शताब्दी पुरुष सत्यमोहन जोशीले डा. उपाध्यायका सात गीति एल्बम, एक उपन्यास ‘सपनाकी रानी’ र आठ उपन्यास संगालो सार्वजनिक गरेका हुन् ।

यसअघि कार्यक्रममा राष्ट्रकवि माधवप्रसाद घिमिरे र बाङ्मय शताब्दी पुरुष सत्यमोहन जोशीको हातबाट एल्बम सार्वजनिक गरिने भनिए पनि राष्ट्रकवि माधवप्रसाद घिमिरे अस्वस्थताका कारण उपस्थिति हुन नसके पछि राष्ट्रकवि कै निवासमा एल्बम सार्वजनिक तथा अभिनन्दन पछि रसियन साँस्कृतिक केन्द्रमा एल्बम सार्वजनिक तथा अभिनन्दन गरिएको थियो । दुवै शताब्दी पुरुषलाई ५१ हजार नगद सहित दोसल्ला र ताम्रपत्र प्रदान गर्दै सम्मान गरिएको थियो ।

एल्बम सार्वजनिक कार्यक्रममा हास्य सम्राज्ञी बसुन्धरा भुसाल र वरिष्ठ गायिका ज्ञानु राणलाई पनि अभिनन्दन गरिएको थियो । त्यस्तै युथ क्रिएशन म्युजिक प्रा.लिबाट डा. डीआर उपाध्यायलाई म्युजिक क्रिएशनका अध्यक्ष रमेश थापा र सल्लाहकार कृष्ण भुसालले दोसल्ला र ताम्रपत्रले सम्मान गरेका थिए ।

सङ्गीतकार सन्तोष श्रेष्ठले स्वागत भाषण तथा कार्यक्रम माथि प्रकाश पारेका थिए भने साहित्यकार सञ्चारकर्मी अच्युत घिमिरेले डा. डीआर उपाध्ययाका उपन्यासका बारेमा बोलेका थिए ।

एल्बममा रहेका गीतमा सन्तोष श्रेष्ठ, सागर अधिकारी ‘शरद’, नरहरि प्रेमी, राज सागर, योगश काजी र डीआर उपाध्यायलगायतको सङ्गीत रहेको छ भने ज्ञानु राणा, आनन्द कार्की, दीलिप लामा, योगश काजी, सागर अधिकारी, नरहरि प्रेमी, राज सागर, योगेश काजी, सारिका घिमिरे, सिमान्त सन्तोष, प्राशना पाण्डे, प्राप्ति सुवेदी, मनोज राज, रिता केसी, इन्दिरा भट्टराई, वसन्ता प्रकृतिलगायतका दुई दर्जन भन्दा बढी गायक गायिकाले स्वर दिएका छन् । एल्बम ‘स्वर्गघर’मा समावेश चार गीतमा भने डा. उपाध्यायले नै स्वर दिएका छन् ।

डा. उपाध्यायका यस अघि ‘जखम’, ‘माउन्टेन मेलोडी’, ‘नसालु नजर’, ‘जोहो’, ‘अन्तराप’, ‘प्रतिनाद’, ‘सहेली’, ‘परिष्कृत’, ‘कृति’ र ‘पृथक’ गरी ११ एल्बम सार्वजनिक भएका थिए । यसैगरी उनका हालसम्म ‘वज्रघात’, ‘त्यागी’, ‘भाग्यचक्र’, ‘अपवित्र छायाँ’, ‘स्वार्थी’, ‘विटुली’, ‘अतिरिक्त’, ‘दगाबाज’, ‘अधुरो प्रेम’ र ‘सपनाकी रानी’ प्रकाशित छन् ।

गीत लेखेर एक पछि अर्को कीर्तिमान कायम गरेका डा. डीआरले सार्वजनिक गीत मार्फत पनि आठ वल्र्ड रेकर्ड कायम भएका छन् । सार्वजनिक कार्यक्रममा एभरेष्ट वल्र्ड रेकर्डका फाउण्डर निर्देशक मधुरा श्रेष्ठले डा. उपाध्यायलाई आठ वटा वल्र्ड रेकर्डको प्रमाण पत्र हस्तान्तरण गरेका थिए । आज कायम भएका वल्र्ड रेकर्डमा २४ फरक गीत १२ मेजर १२ माइनर स्केलमा एउटै एल्बममा, पाँच फरक सङ्गीतकारले सङ्गीत गरेको एउटा गीत, अधिकांस हिन्दू देवी देवताको नाम राखेर बनाइएको गीत, एउटा एल्बममा सबै गीत सेभेन्थ कड्स, सबैलाई स्वस्थ राखौ भन्ने योग सम्बन्धी गीत, महिला प्रताडना सम्बन्धि गीत जसमा ७१ वर्ष र ५ वर्षकी गायिकाको स्वर, अत्यधिक हिमाललाई समेटेर पर्यटन वर्ष २०२० लाई लक्षित गीत र १६ महिनामा १८ एल्बम सार्वजनिक रहेका छन् । यसअघि डा. डीआर उपाध्यायले ६ वल्र्ड रकेड राखेका थिए भने उनको जम्मा वल्र्ड रेकर्डको सङ्ख्या १४ पुगेको छ ।

कार्यक्रममा शताब्दी पुरुष सत्यमोहन जोशीले डा. उपाध्यायले नेपाली गीत सङ्गीतलाई विश्वमा चिनाउने काम गरेको बताए । उनको कार्य सह्रानिय रहेको भन्दै यस्तो कार्य गर्न उनमा अझ जोश जागर बढेर जाओस् र अन्य कीर्तिमान कायम होस् भने ।

सो अवसरमा गायक गायिकाहरु सागर अधिकारी ‘शरद’, नरहरि प्रेमी, योगेश काजी, राज सागर, मनोज राज र सारिका घिमरेले एल्बममा रहेका गीत प्रस्तुत गरेका थिए । समारोहमा मधुरा श्रेष्ठ, सन्तोष श्रेष्ठ, सागर अधिकारी, अच्युत घिमिरे, कृष्ण भुसाल, नरहरि प्रेमी, योगेश काजी, मनोज राज, राज सागर, गीता अधिकारी, सारिका घिमिरे, रमेश थापा, सुभाष प्रधान, नरेश भट्टराईलगायतलाई प्रशंसा पत्र प्रदान गरिएको थियो ।

गीत लेखेर एक पछि अर्को कीर्तिमान कायम गरेका डा. डीआर उपाध्यायले वल्र्ड बुक्स अर्फ अमेरिका, अष्ट्रेलिया, लण्डनलगायत विभिन्न देशबाट वल्र्ड रेकर्डको प्रमाणपत्र प्राप्त गरेका छन् । उपाध्यायले मिराकल वल्र्ड रेकर्ड, इण्डिया स्टार वल्र्ड रेकर्ड, एक्सक्लुसिभ वल्र्ड रकेर्ड, जीनस वल्र्ड रेकर्ड, एभरेष्ट वल्र्ड रकेर्डको प्रमाणपत्र प्राप्त गरिसकेका छन् । उनले नेपाली गीत–सङ्गीतका विविध विधामा गरेको नामको खातिर विश्वका विभिन्न मुलुकले उनलाई सम्मान गरेका हुन् । ‘हिरो २०१९’बाट समेत सम्मानित गीतकार डा. डीआर उपाध्यायलाई गीतकार सङ्घ, नेपालको नवौं वार्षिकोत्सव कार्यक्रममा ‘वर्ष गीत पुरस्कारबाट पुरस्कृत गरिएको थियो ।