वीरगञ्जमा मानव साङ्लो

१६ कात्तिक, वीरगञ्ज – कञ्चनपुरकी १३ वर्षीया बालिका निर्मला पन्तको बलात्कारपछि हत्या भएको सयदिन पुगिसक्दासमेत हत्यारा पत्ता नलागाएको भन्दै वीरगञ्जमा प्रदर्शन गरिएको छ । वीरगञ्जको घण्टाघरमा मानव साङ्लो बनाएर न्याय दिलाउन माग गरिएको हो । वीरगञ्जमा विभिन्न संघ संस्थामा आवद्ध युवा, विद्यार्थीहरु मिलेर मानव साङ्लो निर्माण गरेका थिए ।

घटना भएको सय दिन पुगीसक्दासमेत निर्मलाको बलात्कारपछि हत्या गर्ने व्यक्तिको पहिचान हुन सकेको छैन । प्रहरी प्रशासन र सरकारलाई दवाव दिन र निर्मलाको परिवारलाई हामी साथ छौं भन्ने सन्देश दिन मानव साङ्लो निर्माण गरिएको संस्कृतिकी अध्यक्ष शैली चौधरीले बताइन् ।

‘एउटा बालिकाको बलात्कारपछि हत्या भएको छ, तर हत्यारा अझै पत्ता लाग्न सकेको छैन,’ उनले भनिन, ‘ घटनाको अनुसन्धानमा दवाव दिन र निर्मलाको परिवारको न्यायका लागि हामीले मानव साङ्लो बनाएर प्रदर्शन गरेका हौं ।’ सहभागीहरुले निर्मलाको हत्या भएको सय दिन पुगेको झल्को दिन मानव साङ्लोमार्फत सय बनाएर केहिबेर प्रदर्शन गरेका थिए । मानव साङ्लो निर्माणमा सहभागीहरुले प्ले कार्ड मार्फत ‘जस्टिस फर निर्मला’ भन्ने नारा समेत बनाएका थिए ।