आजको ट्राफिक अपडेट

२२ माघ, काठमाण्डौ – कलंकी, कोटेश्वर, चावहिल, मित्रपार्क, नारायणगोपाल चोक हुदै चल्ने सवारी साधन यतिबेला चापमा चलिरहेका छन् । यस संगै, सोह्रखुट्टे, लैनचौर, केशरमहल, बानेश्वर , बबरमहल, थापाथली, माईतीघर, कालमिाटी, टेकु, टंकेश्वर हुदै संचालन हुने सवारी साधन पनि चापमै चलिरहेको ट्राफिक कन्ट्रोल रुमले जनाएको छ । बिहानको पिक आवरमा बढेका सवारीका कारण चापको अवस्था रहेको हो । सवारी चाप रहेको स्थानहरुमा ट्राफिक व्यवस्थापनको कार्य भैरहेको छ । यस संगै, नागढुंगा स्थित झ्याप्ले मोडमा सवारी साधन बिग्रीएका कारण उक्त स्थान हुँदै संचालन हुने सवारी साधन क्युमा चलिरहेका छन् । बाँकी नाकाहरुको सवारी आवगमन भने सामान्य रहेको छ ।

बर्दियाको बढैयाताल गाँउपालीका ८ बर्मलीमा आज ट्रकको ठक्करबाट मोटरसाईकल चालकको मृत्यु भएको छ । बढैयाताल गाँउपालीका ८ का ३१ बर्षीय भक्त बहादुर क्षेत्रीको मृत्यु भएको हो । क्षेत्री सवार रहेको भे ४ प ५९८४ नम्बरको मोटरसाईकललाई भे १ ख ५२८ नम्बरको ट्रकले आज बिहान साढे ८ बजे, ठक्कर दिएको थियो । दुर्घटनामा गम्भिर घाईते भएका क्षेत्रीको घटनास्थलमै मृत्यु भएको ईलाका प्रहरी कार्यालय मैनापोखरीले जनाएको छ । दुर्घटनामा समलग्न ट्रक सहित चालकलाई प्रहरीले नियन्त्रणमा लिएको छ ।

काठमाडौंको माछापोखरीमा आज बिहान मोटरसाइकल र स्कुटर आपसमा ठोकिँदा दुवै सवारीका चालकहरु घाईते भएका छन् । बा ६१ प ५८५९ नम्बरको मोटरसाईकल र बा ४० प ५३७७ नम्बरका स्कुटर आपसमा ठोकिएका हुन् । दुर्घटनामा घाईते भएका मोटरसाईकल चालक नुवाकोट ककनी ६ घर भई हाल तार्केश्वर नगरपालीका ९ का मुकेश लामा र स्कुटर चालक नुवाकोटकै सितलवेसी घर भई हाल काठमाडौं बुढानिलकण्ठ बस्ने अर्जुन थापाको ग्रिनसिटी अस्पताल धापासीमा उपचार भैरहेको छ । आज बिहान ८ बजे, सो दुर्घटना भएको हो । दुवै सवारी साधनलाई महानगरिय ट्राफिक प्रहरी प्रभाग गोंगबुले नियन्त्रणमा लिएको छ ।

रुपन्देहीको सिद्धार्थ नगरपालीका १३ मा आज मोटरसाइकको ठक्करबाट साईकलयात्री घाईते भएका छन् । लु १९ प ७९६७ नम्बरको मोटरसाईकलको ठक्करबाट घाईते भएका साइकल यात्री रुपन्देहीको रोहणी गाँउपालीका २ का ५५ बर्षीय ताजुदिन मुसलमानको भिम अस्पताल भैरहवामा उपचार भैरहेको छ । बिहान ९ बजे, भएको सवारी दुर्घटनामा संलग्न मोटरसाईकल चालकलाई सवारी साधन सहित संघिय प्रहरी ईकाई कार्यालय भैरहवाले नियन्त्रणमा लिएको छ ।

##traffic.nepalpolice.gov.np##