लागुऔषधसहित दुईजना पक्राउ

४ साउन, भक्तपुर – अबैध लागुऔषधसहित दुई जनालाई महानगरीय प्रहरी बृत्त थिमिले पक्राउ गरेको छ । प्रहरीले मंगलबार भक्तपुरको मध्यपुरथिमि नगरपालिका–१ मनोहराबाट लागुऔषधसहित रामेछाप गोठपाने घरभई अहिले ललितपुर टिकाथली बस्ने २२ वर्षका सुमन कार्की र रामेछाप मन्थली घरभई पुरानो बानेश्वर बस्ने २० वर्षका प्रविण लामालाई पक्राउ गरेको हो ।

बा ४० प ७५५८ नम्बरको स्कुटरमा राखेर लागुपदार्थ लैजाँदै गरेको अवस्थामा प्रहरीले उनीहरुलाई पक्राउ गरेको महानगरीय प्रहरी बृत्त थिमिका प्रहरीले जानकारी दिए । प्रहरीले कार्की र लामाको साथबाट एम्पुल लुपिजेसिक, फेनारगन, डाईजाल्याब, ८३ थान एभिल, २५० थान एपाकडोल, ५३ थान अल्कोहल स्वाब, ६ वटा सिरिञ्ज र दुईवटा मोवाइल बरामद गरेको हो । प्रहरीले स्कुटर समेत नियन्त्रणमा लिएर अनुसन्धान अगाडि बढाएको छ भने पक्राउ परेका दुवैलाई लागु पदार्थ ऐन अन्तर्गत कारबाही चलाउने प्रहरीले बताएको छ।