पाल्पामा मनोनयन दर्ता गराएका ८ जना उम्मेदवारले उम्मेदवारी फिर्ता लिए

७ असार, पाल्पा – पाल्पामा असार १४ गते हुने स्थानीय तह निर्वाचनका लागि मनोनयन दर्ता गराएका ८ जना उम्मेदवारले उम्मेदवारी फिर्ता लिएका छन् ।

माथागढी गाउँपालिका प्रमुखमा उम्मेदवारी दिएकी राष्ट्रिय प्रजातन्त्र पार्टीबाट विष्णुदेवी सोमै र उपाध्यक्ष पदमा उम्मेदवारी दिएकी वेदकुमारी गाहा थापाले मनोनयन फिर्ता लिएका छन् । माथागढी, २ मै वडाअध्यक्षमा स्वतन्त्र उम्मेदवार भागिरथ भट्टराईले पनि फिर्ता लिएको निर्वाचन अधिकृत डोलराज ढकालले बताए ।

त्यसै गरी रम्भा गाउँपालिकाबाट पनि तीन जना स्वतन्त्र सदस्य उम्मेदवारले मनोनयन फिर्ता लिएका छन् । जिल्ला निर्वाचन कार्यालयका सूचना अधिकारी थमन बहादुर सारुका अनुसार रम्भा, ३ बाट स्वतन्त्र सदस्यमा उम्मेदवारी दिएका धनबहादुर चिदी, गम्भिरसिं सिंजाली र शान्तिदेवी सिंजालीले मनोनयन फिर्ता लिएका हुन् ।

त्यस्तै, नेकपा माओवादी केन्द्रबाट तानसेन नगरपालिका, ४ वडाअध्यक्षका उम्मेदवार विष्णुप्रसाद अधिकारीले पनि उम्मेदवारी फिर्ता लिएका छन् । तानसेन, ६ की राप्रपाकी वडा सदस्य उम्मेदवार मुना सार्कीले पनि उम्मेदवारी फिर्ता लिएको जिल्ला निर्वाचन कार्यालयले जनाएको छ ।

यसैबीच जिल्ला निर्वाचन कार्यालयले पाल्पाको निस्दी र पूर्वखोला गाउँपालिकाको दलित महिला सदस्यमा दुई जना निर्विरोध भएको जनाएको छ । पूर्वखोला गाउँपालिका, ४ देवीनगरकी लक्ष्मी विकको एकल उम्मेदवारी परेको छ । उनले एमालेबाट उम्मेदवार दिएकी हुन् ।

यस्तै, निस्दी गाउँपालिका, ३ झिरुवासमा समेत एमालेबाट कुमारी विकको मात्रै उम्मेदवारी परेको निर्वाचन अधिकृत कृष्णप्रसाद शर्माले बताए ।