सिएमजी संकटा क्लब पोखरामा जारी आहा रारा गोल्डकपको सेमिफाइनलमा प्रवेश गरेको छ । पोखरा रंगशालामा मंगलबार भएको खेलमा पाहुना टोली नारायणगञ्ज फुटबल क्लव बंगलादेशलाई २-० ले पराजित गर्दै संकटाले अन्तिम ४ मा स्थान पक्का गरेको हो ।
संकटाले अब फाइनल प्रवेशका लागि विहीबार डिफेन्डिङ्ग च्याम्पियन मनाङमर्स्याङ्दीसँग प्रतिष्पर्धा गर्नुपर्नेछ ।
फारसगञ्ज स्पोर्टिङ क्लबले अन्तिम समयमा आएर प्राविधिक कारण देखाउँदै प्रतियोगितामा सहभागि नहुने बताएपछि आयोजकको आग्रहमा आएको बंगलादेशको नारायणगञ्ज गोल्डकप जितेको नारायणगञ्ज एफसी पहिलो खेलबाटै बाहिरिएको छ ।
संकटाको जितमा निराजन खड्का र विश्वास श्रेष्ठले गोल गरे । दुबै तर्फ कमजोर प्रदर्शन भएको मंगलबारको खेलमा संकटाले ५३ औं मिनेटमा गोलको खाता खोल्यो । मैदानको बायाँ साइडबाट कोएरा सार्बा फ्लोरेन्ट कोनेले दिएको हेडर पासमा निराजन खड्काले गोल गर्दै संकटालाई अग्रता दिलाए ।
दोस्रो गोल भने संकटाले निर्धारित ९० मिनेट सकिएपछिको अतिरिक्त एक मिनेटमा गर्यो । संकटाका विश्वास श्रेष्ठले डी एरियामा पाएको बललाई सिधै जाली चुमाए ।
बंगलादेशको चार जना राष्ट्रिय खेलाडी पनि समावेश नारायणगञ्ज एफसीले कमजोर प्रदर्शन गर्यो । उसो त अफि्रकन र मनाङका खेलाडी भित्राएको संकटाले पनि मंगलबारको खेलमा उत्कृष्ट प्रदर्शन गर्न सकेन । यद्यपी दोस्रो हाफमा आएर उसले गोल निकाल्दै नतिजा आफ्नो पक्षमा पार्यो ।
पहिलो हाफ गोलरहित बराबरी खेलेको संकटाले केही राम्रा अवसर समेत सदुपयोग गर्न सकेन । १६ औं मिनेटमा सुनिल बलको कर्नर किकमा निराजन खड्काले गरेको हेडर सेकेण्डबार हुँदै बाहिरियो । १७ औं मिनेटमा सुशील केसी गोल गर्न चुके ।
डी एरिया नजिक बिपक्षी गोलकिपर मात्र हुँदा ‘वान भर्सेस वान’मा बललाई पोष्टको दिशा दिन सकेनन् । सो समयमा किपरसँग जुध्दा बिपक्षी किपर मोहम्मद राजिव गम्भीर घाइते भए । सोही कारण ५ मिनेट खेल अबरुद्ध भयो भने उनी खेल्न नसक्ने भएपछि उनको सट्टामा सोराब सरकार मैदान पसे ।
३५ औं मिनेटमा सुनिल बलले प्रहार गरेको फ्री किक बिपक्षी किपरले मुश्किलले बचाए । ५४ औं मिनेटमा कोएरा लार्बाको पासमा सुशील केसीले प्रहार गरेको बल फस्ट बार हुँदै बाहिरियो । ६५ औं मिनेटमा अमित तामाङको प्रहार बिपक्षी गोलकिपरले मुश्किलले बचाए ।
बंगलादेशी टीम नारायणगञ्ज एफसीले केही गोल गर्ने अवसर सिर्जना गरेपनि गोलमा परिणत गर्न सकेन । पहिलो हाफको अतिरिक्त समयको दोस्रो मिनेटमा टोनी बारमोनको कडा प्रहार क्रसबार भन्दा थोरै मात्र माथीबाट बाहिरियो । ६६ औं मिनेटमा टोनी बारमोनकै प्रहार किपरले मुश्किलले पञ्च गरेर फाले ।