नाजिरको नृत्यको तारिफ

काठमाडौं- चलचित्र ‘गुन्यु चोलो : द ड्रेस’ को गीत ‘म फूल हुँ कि काँडा’ सार्वजनिक भएसँगै दर्शकबाट अत्यन्त सकारात्मक प्रतिक्रिया प्राप्त गरिरहेको छ । पछिल्लो समय सानो विषयमा समेत आलोचना गर्ने प्रवृत्ति बढ्दै गएको भए पनि, यस गीतले भने शतप्रतिशत प्रशंसा बटुल्न सफल भएको छ । गीतको लोकप्रियता मात्र होइन, यसमा नृत्य तथा अभिनय गर्नुभएका अभिनेता नाजिर हुसेनको कला र क्षमताले विशेष चर्चा पाइरहेको छ । युट्युबलगायत सामाजिक सञ्जालमा उहाँलाई ‘बहुमुखी अभिनेता’ भन्दै प्रशंसा गर्नेहरू बढिरहेका छन् ।

दर्शकहरू नाजिरलाई अभिनय प्रतिभा उजागर गर्ने ‘पूर्ण बहादुरको सारंगी’ जस्तै एउटा विशेष चलचित्र आवश्यक रहेको प्रतिक्रिया दिइरहेका छन् । विजय थापा लेख्नुहुन्छ, ‘नाजिर, तिमी एक महान् अभिनेता हौ । उत्कृष्ट पात्रहरूमा अभिनय गरिरहनु । विवादबाट टाढा रहनु, शुभकामना ।’

चलचित्रमा नाजिरले ट्रान्सवुमन (तेस्रोलिंगी महिला)को भूमिका निर्वाह गर्नुभएको छ । दर्शकहरूले उहाँको गेटअप हेरेर ‘के साँच्चै नाजिर नै हो ?’ भनी अचम्म प्रकट गरेका छन् । ‘वाउ, हृवाट अ पर्फर्मेन्स !’ भन्ने प्रतिक्रिया सामान्यजस्तै भएको छ । रिसभ आले लेख्नुहुन्छ, ‘साँचिकै भन्नुपर्दा मैले पहिलोपटक भिडियो हेर्दा नाजिरलाई चिन्न सकिन । दोस्रो पटकमात्र पहिचान गर्न सकेँ । अभिनयको लागि सलाम ।’
गीतमा शब्द लेखु सहयात्रीको छ भने स्वर मनिषा पोखरेलको र संगीत लेखु स्वयंको छ । समुन्द्र भट्टको निर्देशनमा बनेको चलचित्र ‘गुन्यु चोलो : द ड्रेस’ भदौ १३ गतेबाट प्रदर्शनमा आउँदैछ । चलचित्र ट्रान्सवुमनको जीवन संघर्ष र समाजसँगको अन्तक्र्रिया प्रस्तुत गर्ने उद्देश्यका साथ निर्माण गरिएको हो । यसमा नाजिरसँगै सञ्चिता लुइँटेल, सुशील सिटौला, राजकुमार घोष, शिशिर राणा, अनुपम श्रेष्ठ र विशाल पहारीको अभिनय छ ।

नेपालमा पहिलोपटक लैंगिक तथा यौनिक अल्पसंख्यक पात्रलाई पूर्णरूपमा केन्द्रमा राखेर निर्माण गरिएको यस चलचित्रको अन्तर्राष्ट्रिय वितरण अधिकार अमेरिकाको बफेलो एट्लेले खरिद गरिसकेको छ । चलचित्रको सम्पूर्ण पोष्ट–प्रोडक्सन कार्य विदेशमै गरिएको छ । एडिटिङ, कलर ग्रेडिङ, साउन्ड डिजाइन, मिक्सिङ र ब्याकग्राउण्ड म्युजिक हलिउड स्तरमा गरिएको छ । ‘ग्ल्याडिएटर-२’ मा स्वर दिएकी हलिउड गायिका लिजा जेरार्डले यस चलचित्रमा समेत स्वर दिनुभएको छ भने संगीतकार मार्सेलो दि फ्रान्सिसीले ब्याकग्राउण्ड स्कोर तयार पार्नुभएको छ ।

चलचित्र नेपाली तथा हलिउड प्रोडक्सन हाउसको संयुक्त लगानीमा बनेको हो । आकाश बुढाथोकी र भि-भन्से जानुबोनको लगानी रहेको चलचित्रका कार्यकारी निर्माता जेफ्री जे वेन र स्टिभ जोन्स्टन हुनुहुन्छ । सहनिर्मातामा अनुपम श्रेष्ठ रहनुभएको छ । चलचित्रको छायांकन आलोक शुक्लाले गर्नुभएको हो । ‘गुन्यु चोलो : द ड्रेस’ अमेरिकाको प्रतिष्ठित तस्वीर फिल्म मार्केटमा समेत छनोट भइसकेको छ ।