नेकपा स्थायी कमिटी बैठक सुचारु गर्ने निश्कर्ष, ओलीको राजीनामा मुख्य एजेण्डा

काठमाडौ – सत्तारुढ दल नेपाल कम्युनिष्ट पार्टी (नेकपा) को आन्तरिक विवाद समाधानको लागि अध्यक्षद्धय केपी शर्मा ओली र पुष्पकमल दाहाल प्रचण्डबीच पटक पटक भएका भेटवार्ताले विवाद हल गर्ने ठोस सहमति निकाल्न सकेको छैन् । गत असार १० गतेदेखि सुरु भएको पार्टीको स्थायी कमिटी बैठकमा बोल्ने अधिकांश सदस्यहरुले ओलीलाई प्रधानमन्त्री र अध्यक्ष दुवै पदबाट राजीनामा दिन माग गरेपछि विवाद चुलिएको हो ।

तर, ओलीले आफूले दुवै पदबाट कुनैपनि हालतमा राजीनामा नदिने अडान लिएका छन् । दुई अध्यक्षबीच सहमति खोजिने प्रयासमा स्थायी कमिटीको बैठक नै प्रभावित भएको छ । ओली र दाहालबीच धेरैपटक एक्लाएक्लै भेटवार्ता भएका छन् । तर, दुवै जना आफ्नो अडानबाट टसमस नभएपछि भेटवार्ताले विवाद समाधानको लागि कुनै बाटो तय गर्न सकेको छैन् । स्थायी कमिटीको बैठक सुचारु गरेर अघि बढ्न दाहाललाई बरिष्ठ नेताहरु झलनाथ खनाल र माधव कुमार नेपाल, उपाध्यक्ष वामदेव गौतम र प्रवक्ता नारायणकाजी श्रेष्ठले दबाब दिएका छन् । पार्टीको निर्णय ओलीले मानेर अघि बढ्नुपर्ने भन्दै अर्का सचिवालय सदस्य रामबहादुर थापाले पनि दाहाललाई साथ दिएका छन् ।

ओलीलाई राजीनामा दिन दाहाल- नेपालको आग्रह, बालुवाटारको भेटवार्ता सम्पन्न

स्थायी कमिटीको बैठक भोलि विहान ११ बजेलाई डाकिएको छ । तर, बैठक बस्ने वा नबस्ने भन्नेबारे अझै टुँगो छैन् । बैठकको पूर्व सन्ध्यामा दाहाल(नेपाल समूहले आज दाहाल निवास खुमलटारमा छलफल गरेको थियो । उक्त छलफलमा सचिवालयका ६ जना सदस्यहरु सहभागी थिए । गृहमन्त्रीसमेत रहेका बादलपनि बैठकमा सहभागी थिए । खुमलटारमा भएको ६ भाईको भेलाले अब बैठक स्थगित् गरेर राख्न नहुने निश्कर्ष निकालेको छ ।

स्रोतकाअनुसार भोलिको बैठक सुचारु गरेर अघि बढ्ने र पार्टीको निर्णय सबैले मान्नुपर्ने निश्कर्ष निकालेको छ । यसअघि ओलीले दुवै पदबाट राजीनामा दिनुपर्ने माग गरेको दाहाल नेपाल समूहले अहिले प्रधानमन्त्रीबाट मात्रै राजीनामा दिनुपर्ने भन्दै लचकता देखाएको छ । तर, ओलीले भने कुनैपनि हालतमा दुवै पद नछोड्ने अडान लिएका छन् ।

#REPORTERS NEPAL#