आज वार्षिक बजेट तथा कार्यक्रम प्रस्तुत गरिने

१५ जेठ, काठमाडौं – नयाँ कार्यक्रम समावेश नगरे पनि सरकारले आगामी आर्थिक वर्ष ०७४–०७५ का लागि आज बजेट ल्याउने भएको छ । सरकारले आव २०७४ ७५ का लागि आज दिउँसो ४ बजे वार्षिक बजेट तथा कार्यक्रम प्रस्तुत गर्ने भएको छ । उपप्रधानमन्त्री एवम् अर्थमन्त्री कृष्णबहादुर महराले सदनसमक्ष रू १२ खर्बभन्दा बढीको बजेट प्रस्तुत गर्ने अनुमान गरिएको छ ।  राष्ट्रिय योजना आयोगले रू ११ खर्ब ५६ अर्बको बजेट सीमा तोकेको थियो । बजेटमा नयाँ कार्यक्रमहरू नराखिने भनिए पनि सरकारले ७ सय ४४ स्थानीय तहलाई रकम विनियोजन गर्नुपर्ने र प्रदेश तथा सङ्घको निर्वाचनसमेत गर्नुपर्ने भएकाले चालू आवको भन्दा लगभग २ खर्ब बढीे बजेट विनियोजन हुने बुझिएको छ ।  नेपालको संविधान जारी भएपछिको यो दोस्रो बजेट हो । बजेटले संविधान कार्यान्वयन, निर्वाचन, ऊर्जा, पूर्वाधार, कृषि विकास, शिक्षा, स्वास्थ्य, गरिबी निवारणलगायत विषयलाई उच्च प्राथमिकतमा राखेर बजेट पेस गर्नेछ । गत वर्षको तुलनामा यो वर्ष स्थानीय तहमा अधिक रकम विनियोजन गरेर बजेट बनाइएको अर्थ मन्त्रालयका प्रमुख आर्थिक सल्लाहकार प्रा.डा. पुण्यप्रसाद रेग्मीले जानकारी दिए ।

यसैबीच व्यवस्थापिका–संसद्को आइतवार बसेको बैठकले नीति तथा कार्यक्रम पारित गरेको छ । सरकारले आइतवार नै आर्थिक सर्वेक्षण पनि संसद्मा प्रस्तुत गरेको छ ।