भन्सार छुट दिएका बस्तुबाट लाभ लिन अमेरिकाको आग्रह

८ बैशाख, काठमाडौँ – नेपालसँग भन्सार छुट दिएका बस्तुको व्यापार बढाएर लाभ लिन अमेरिकाले आग्रह गरेको छ ।

शुक्रबार काठमाडौँमा नेपालस्थित अमेरिकी दुतावासले एक कार्यक्रम गरी भन्सार छुट दिने अमेरिकीबाट लाभ लिन नेपाल सरकार र नेपाली व्यवसायीहरुलाई आग्रह गरेको हो । अमेरिकी सरकारले नेपालले उत्पादन गरेका सल, गलैंचा, झोला, स्कार्फ, सिरपोस, छाला तथा भ्रमण सामग्रीमा छुट दिने व्यवस्थासहितको कार्यक्रम तय गरेको छ ।

वाणिज्य मन्त्री रोमी गौचन थकालीले कार्यक्रममा बोल्दै अमेरिकाले उपलब्ध गराएको भन्सार छुटसहितको व्यवस्थाबाट नेपाली व्यवसायी र सरकार उत्साही भएको बताए । बस्तु निर्यातका लागि अमेरिकाले दिएको भन्सार छुटबाट आफूहरु उत्साही भएको नेपाल उद्योग वाणिज्य महासंघकी अध्यक्ष भवाणी राणाले बताइन् ।