लाइब्रेरीमा लगेर देखाएका थिए आपत्तिजनक भिडियो, पायलको अनुराग कश्यपमाथि आरोप

नायिका पायल घोषले निर्देशक अनुराग कश्पमाथि यौन शोषणको आरोप लगाएकी छिन् । ती आरोप आधारहीन भएको भन्दै अनुराग कश्यपले पनि जवाफ दिइसकेका छन् । अब यो मामिलामा पायलले विस्तृत जानकारी दिएकी छिन् । उनका अनुसार अनुरागले उनलाई लाइब्रेरीमा लगेर आपत्तिजनक भिडियो देखाउने गर्दथे ।

पायलले भारतीय मिडियासँगको कुराकानीमा सो कुरा जानकारी दिएकी हुन् । उनले आफूले सो कुरा मीटू अभियानका बेला पनि ट्वीटरमा लेखेका बताएकी छिन् । तर पछि उनले आफ्नो उक्त ट्वीट डिलिट गरेको पनि बताइन् । नायिकाले भनिन्, ‘हाल म आफ्नो परिवारको समर्थनको आशा गरिरहेकी छु । त्यसपछि म एजेन्सीलाई सम्पर्क गर्नेछु । यदि अनुरागले माफी मागेको भए, म उनलाई माफी दिन्थेँ । म इन्डष्ट्रिबाट पनि समर्थन होस् भन्ने चाहन्छु ।’

पायलले भारतीय प्रधानमन्त्री नरेन्द्र मोदीलाई ट्वीट गरेर लेखेकी थिइन्, ‘अनुराग कश्यप निकै नराम्रो गरी मलाई दबाब दिए । नरेन्द्र मोदीजी कृपया एक्सन लिनुहोस् र यी सृजनात्मक व्यक्ति पछाडिको राक्षसलाई उदाङ्गो पारिदिनुहोस् । मलाई थाहा छ, यसले मलाई क्षती पुर्याउन सक्छ । मेरो सुरक्षा खतरामा छ । कृपया मद्दत गर्नुहोस् ।’