माछा मार्ने क्रममा जालमा अल्झिएर एकको मृत्यु,एकजना बालक बेपत्ता

२८ बैशाख, गुल्मी – गुल्मी जिल्लाको बडिघाट खोलामा माछा मार्ने क्रममा एकजनाको ज्यान  गएको छ ।

चन्द्रकोट गाउँपालिकाको मजुवा बजार नजिकै बढीघाट खोलामा जाल हानेर माछा मार्ने क्रममा सोही जालमा अल्झिएर चन्द्रकोट गाउँपालिका–८ का २५ वर्षका युवराज रजालीको ज्यान गएको जिल्ला प्रहरी कार्यालय गुल्मीले जनाएको छ । बाढी आएका कारण धमिलो खोलामा माछा मार्ने क्रममा रजाली जालमा अल्झिएर खोलामा डुब्दा बुधबार ज्यान गएको प्रहरीले जनाएको छ ।

सोही खोलामा पौडी खेल्ने क्रममा एकजना बालक बेपत्ता भएका छन् । चन्द्रकोट गाउँपालिका अन्तर्गत पुलकामुखमा पौडी खेल्ने क्रममा दवार गाउँपालिका–१ बलिथुमका १३ वर्षका राजेन्द्र परियार बेपत्ता भएको प्रहरीले जनाएको छ ।