कलाकार सङ्घको ३५औँ स्थापना दिवसको पहिलो दिनको कार्यक्रम सम्पन्न

काठमाण्डौ – कलाकार सङ्घको ३५औँ स्थापना दिवसको पहिलो दिनको कार्यक्रम सम्पन्न काठमाडौँ, भदौ २३, २०८० नेपाल चलचित्र कलाकार सङ्घको ३५औँ स्थापना दिवसका अवसरमा आयोजित पहिलो दिनको कार्यक्रम सम्पन्न भएको छ । वि.सं. २०४५ भदौ २३ गते स्थापना भएको सङ्घले शनिवार र आइतवार दुई दिन विभिन्न कार्यक्रमहरू आयोजना गरी स्थापना दिवस मनाईरहेको छ । नेपाल चलचित्र कलाकार संघका अध्यक्ष मोहन निरौलाको सभापतित्वमा शनिवार सम्पन्न पहिलो दिनको कार्यक्रममा सम्मान, मानार्थ सदस्यता प्रदान, शुभकामना मन्तव्य, अवधारणापत्र प्रस्तुती र त्यसमाथी टिप्पणी कार्यक्रमको आयोजना भएको छ ।

त्यस्तै, आइतवार हुने दोश्रो दिनको कार्यक्रममा योगगुरु राम पाण्डेद्वारा योग अभ्यास, डा. विकासानन्दद्वारा मोटिभेसन लेक्चर र डा. श्याम खड्काद्वारा चिकित्सकिय परामर्श हुनेछ । पहिलो दिनको कार्यक्रम चलचित्र विकास बोर्डका कार्यकारी अध्यक्ष भुवन केसीको प्रमुख आतिथ्यतामा भएको हो । कार्यक्रममा सङ्घकी संरक्षक बसुन्धरा भुषाल, सङ्घका पूर्वअध्यक्ष तथा सल्लाहकारहरू कृष्ण मल्ल, रमेश बुढाथोकीको उपस्थिति थियो भने सल्लाहकार राजकुमार राई तथा सङ्घका निवर्तमान अध्यक्ष रविन्द्र खड्का, कानूनी सल्लाहकार कृष्ण ढुङ्गाना, कलाकार सन्तोष पन्त, अभिनेत्री चैत्यदेवि सिंह, निर्देशकद्वय आकाश अधिकारी र नरेश पौडेल, कलाकार आरपि पन्त, तैय्यव शाह, मुकुन्द किशोर भट्टराई,चलचित्र निर्देशक माधव राज खरेल लगायत नेपाली चलचित्र क्षेत्रसँग सम्बन्धित विभिन्न सङ्घसंस्थाका अध्यक्ष तथा प्रतिनिधिहरूको उपस्थिति रहेको थियो ।

कार्यक्रममा संविधानविद् भिमार्जुन आचार्य, धुलिखेल नगरपालिकाका मेयर अशोक ब्यञ्जु श्रेष्ठ, द्वन्द्व निर्देशक राजेन्द्र खड्गी, दन्त चिकित्सक डा. सुवास घिमिरे, खेलकुदकर्मी बिष्णु गोपाल श्रेष्ठलाई सङ्घको मानार्थ सदस्यताको परिचयपत्र प्रदान गरिएको थियो । त्यस्तै, सङ्घलाई आर्थिक तथा भौतिक सहयोग गर्ने ध्रुव देवकोटा, मनोज खत्री, राजीव गिरी, डा.रुपक घिमिरे, प्रकाश पुरी र श्रीदेव बिएललाई आभारपत्र प्रदान गरिएको थियो भने अन्तराष्ट्रिय नेपाल साहित्य समाज नेपाल च्याप्टरको अध्यक्ष चयन भएकोमा चलचित्रकर्मी तथा साहित्यकार राजेन्द्र केसीलाई बधाई पत्र प्रदान गरिएको थियो ।कार्यक्रममा संघकी पुर्ब उपाध्यक्ष अभिनेत्री लक्ष्मी गिरीले नेपाल चलचित्र कलाकार संघको गठन गरेको कलाकार कल्याण कोषलाई पचिस हजारको चेक हस्तान्तरण गर्नु भएको थियो ।स्थापना दिबशको पहिलो चरणको कार्यक्रम संचारकर्मी जीबन पराजुलीले र दोश्रो चरणको कार्र्यक्रम गोपाल ढकालले संचालन तथा धन्यवाद ज्ञापन संघका सचिब रामेश्वर बुर्लाकोटीले गर्नु भएको थियो ।

सङ्घद्वारा तयार पारिएको ‘नेपाली चलचित्रको गुणस्तरमा पेशाकर्मीको भूमिका’ बिषयक अवधारणापत्र सङ्घका प्रेस सल्लाहकार शान्तिप्रियले प्रस्तुत गर्नु भएको थियो भने सो अवधारणापत्रमाथि चलचित्र कलाकार तथा निर्माता रबिन्द्र सिंह बानियाँ, चलचित्र लेखक अभिमन्यु निरवी र चलचित्र निर्देशक तथा सञ्चारकर्मी सङ्गीता श्रेष्ठले टीप्पणी गर्नु भएको थियो । कार्यक्रम नेपाल चलचित्र कलाकार संघकी स्थापनाकालकी तदर्थ समितिका संयोजक स्व शान्ती मास्केको तस्वीरमा माल्यार्पण गरि स्व सानु ताम्राकार , स्व सारूक ताम्राकार लगायत दिबंगत कलाकारहरूको संझनामा मौन धारण पनि गरिएको थियो ।।