कोरोना संक्रमणमुक्त किशोरीको घरमै पुगेर नमोबुद्धका मेयरले ग्रहण गरे अभिभाकत्व

काभ्रे– नमोबुद्ध नगरपालिकाका प्रमुख टिपी शर्मा तिमल्सिनाले कोरोना संक्रमणबाट मुक्त भएकी एक किशोरीको शिक्षाका लागि अभिभावकत्व ग्रहण गरेका छन् ।
हिजोमात्रै धुलिखेल अस्पतालबाट डिस्चार्ज भएर घर फर्किएकी नमोबुद्ध नगरपालिका ५ की ती किशोरीको घरमै पुगेर नगरमुख तिमल्सिनाले स्नातक तहसम्मको शिक्षाका लागि व्यक्तिगत तर्फबाट खर्च व्यहोर्ने गरी अभिभावकत्व ग्रहण गरेका हुन् । वडाअध्यक्ष बुद्धसिंह तामाङसँगै आज शुक्रबार ती किशोरीको घरमा पुगेका तिमल्सिनाले किशोरीको परिवारको आर्थिक अवस्था कमजोर रहेको जानकारी पाएपछि आफ्नै खर्चमा उनलाई स्नातकसम्म पढाउने निर्णय गरेका हुन् । ती किशोरी अहिले कक्षा १२ मा अध्ययनरत छिन् । उनको परिवारमा ६ जना रहेका छन् भने परिवारको आर्थिक अवस्था एकदमै कमजोर रहेको छ । उनका पिताले सामान्य खेती किसानी गरेर परिवार चलाउँदै आएका छन् ।
देशका विभिन्न स्थानमा कोरोना संक्रमितमात्रै नभई उनीहरुको उपचारमा संलग्न स्वास्थ्यकर्मीमाथिसमेत दुव्र्यवहार भइरहेका बेला किशोरी र उनको परिवारको हौसला बढाउन तिमल्सिना किशोरीको घरमा पुगेका थिए । उनले कोरोना संक्रमण भएका व्यक्तिलाई दुव्र्यवहार हैन हौसला प्रदान गर्नुपर्छ भन्ने सन्देश समुदायसम्म पु¥याउनुपर्नेमा जोड पनि दिए । अहिले कोरोना भाइरसका विषयमा समुदायमा जुन किसिमको त्रास र आतंक फैलिएको छ त्यो गलत रहेको तर सबै यसबाट सचेत र सजग रहनुपर्ने तिमल्सिनाले बताए ।
उनले आत्मबल बलियो बनाउन कोरोना संक्रमण भएका व्यक्तिहरुलाई आग्रहसमेत गरेका छन् । ‘रोग लाग्यो भनेर आत्तिने हैन, हिम्मत बढाउने र स्वास्थ्य सजगता अपनाउने गर्नुपर्छ’ तिमल्सिनाले भने । नगरप्रमुख आफ्नो घरसम्मै आएर हौसला प्रदान गरेकोमा संक्रमणबाट मुक्त भएकी किशोरीले खुशी व्यक्त गरिन् । उनले आफ्नो शिक्षाका लागि नगरप्रमुखले अभिभावकत्व ग्रहण गर्नुले आफूलाई अझै अध्ययन अगाडि बढाउन हौसला मिलेको पनि बताइन् । ती किशोरीमा कोरोना संक्रमण देखिएपछि साउन ३१ गतेदेखि धुलिखेल अस्पतालमा राखेर उपचार गरिएको थियो ।
नमोबुद्ध नगरपालिकाका प्रमुख तिमल्सिनाले विगतदेखि नै व्यक्तिगत तर्फबाट विपन्न र जेहेन्दार विद्यार्थीको शिक्षाका लागि सहयोग गर्दै आएका छन् । आफ्नो जन्मदिनको अवसर पारेर उनले बुधबारमात्रै १ लाख रुपैयाँ भन्दा बढी रकम विद्यार्थीहरुको शिक्षाका लागि प्रदान गरेका थिए ।