कोरोना संक्रमणबाट भदौको एक हप्ताभित्र ४५ जनाको मृत्यु

काठमाडौं- नेपालमा कोरोना भाइरसको संक्रमणबाट दैनिक मानिसको मृत्यु हुन थालेको छ । लगातार मृतक संख्या बढ्दै जाँदा महामारीको संकट भयावहतर्फ उन्मुख भएको छ ।

भदौको सात दिनमै ४५ जनाको कोरोना संक्रमणबाट मृत्यु भएको छ । एकै दिन किर्तिमानी ११ जनाको मृत्यु पनि यसै महिना भएको छ । २० साउनबाट दैनिक कोरोना संक्रमणबाट मृत्यु संख्या थपिने क्रम रोकिएको छैन ।

२ जेठमा कोरोना भाइरसबाट पहिलो मृत्यु पुष्टि भई फाट्टफुट्ट मृत्युका घटना हुने गरेकोमा पछिल्लो समय लगातार मानिसको मृत्यु हुने क्रम बढेको छ । जेठ देखि साउनभित्र एक सय ४ जनाको कोरोना संक्रमणबाट मृत्यु भएको थियो । तर, भदौको १ देखि ७ गतेभित्र ४५ जनाको मृत्यु भइसकेको छ । जेठमा भन्दा असारमा, असारमा भन्दा साउनमा बढी मानिसको मृत्यु भएको तथ्यांक छ । दैनिक मृत्युदर बढिरहँदा भदौ महिनामा विगत तीन महिनाको भन्दा बढी मृत्यु रेकर्ड हुने प्रक्षेपण गरिएको छ ।

नेपालमा कोरोना भाइरसको संक्रमणबाट अहिलेसम्म मृत्यु हुनेको संख्या एक सय ४९ पुगेको छ । मृत्यु हुनेमध्ये एक सय १५ पुरुष र ३४ महिला छन् ।