नोवल कोरोना भाइरस : चीनमा एकैदिन १०८ जनाको मृत्यु

बेइजिङ — नोवल कोरोना भाइरसका कारण चीनमा सोमबार एकै दिन १०८ जनाको मृत्यु भएको छ । गत डिसेम्बरमा संक्रमण देखिएयता मृत्यु हुनेको यो सबैभन्दा ठूलो संख्या हो । चिनियाँ अधिकारीले शनिबार मात्रै मृत्युदरमा कमी आएको बताए पनि आइतबार र सोमबार मृतकको संख्या बढेको हो। आइतबार मात्रै ९७ जनाको मृत्यु भएको थियो। सोमबार मृत्यु हुनेमध्ये १०३ जना हुबेई प्रान्तका थिए।कोरोनाका कारण मृत्यु हुनेको संख्या मंगलबार बिहानसम्म एक हजार १८ पुगेको छ । मुख्यभूमि चीनभर सोमबार थप २ हजार ४ सय ७८ जना नयाँ संक्रमित पाइएका छन्। यो संख्या आइतबारको तुलनामा भने धेरै कम हो।

आइतबार ३ हजार ६२ जना नयाँ संक्रमित भएका थिए । योसँगै मंगलबार बिहानसम्म चीनमा मात्रै कोरोना भाइरस संक्रमितको संख्या ४२ हजार ६ सय ३८ पुगेको राष्ट्रिय स्वास्थ्य आयोगले उल्लेख गरेको छ । चीनबाहिर २७ देशमा ४ सय ६० भन्दा बढी व्यक्तिमा कोरोना भाइरसको संक्रमण भेटिएको छ । चीनबाहिर फिलिपिन्स र हङकङमा एकरएक जनाको मृत्यु भएको छ । यसैबीच, चिनियाँ स्वास्थ्य अनुसन्धानकर्ताले कोरोना भाइरसको इन्क्युबेसन अवधि १४ बाट २४ दिन पुर्‍याउनुपर्ने हुन सक्ने बताएका छन् ।

थपिएको बिदा सकिएसँगै सोमबारबाट चिनियाँ नागरिक काममा फर्किएका छन् । नोवल कोराना भाइरस संक्रमणबाट बच्न भन्दै सरकारले लुनार नयाँ वर्षको बिदा थपेको थियो । सरकारले लगाएको प्रतिबन्ध खुकुलो गरेसँगै सर्वसाधारण सामान्य जीवनमा फर्किएका हुन् । नयाँ वर्षको बिदामा १० दिन थप गरिएको थियो । बिदा जनवरीको अन्त्यमा सकिनुपर्थ्यो । सोमबारबाट कार्यालय खुले पनि अझै अधिकांश बन्दै रहेको र धेरैले घरबाटै काम गरिरहेको समाचार संस्था रोयटर्सले उल्लेख गरेको छ । काममा हिँडेका पनि अनुहारमा मास्क लगाएका देखिन्थे ।

कहाँ कति संक्रमित?
चीन – १०१६ मृत्यु, ४२,६३८ संक्रमित
हङकङ – १ मृत्यु, ४२ संक्रमित
फिलिपिन्स – १ मृत्यु, ३ संक्रमित
संक्रमित मात्रै
जापान – १६१
सिंगापुर – ४५
थाइल्याण्ड – ३२
दक्षिण कोरिया – २८
ताइवान – १८
अस्ट्रेलिया – १५
मलेसिया – १८
जर्मनी – १४
भियतनाम – १४
अमेरिका – १३
मकाओ – १०
क्यानडा – ७
फ्रान्स – ११
यूएई – ८
इटाली – ३
भारत – ३
बेलायत – ८
रुस – २
श्रीलंका – १
कम्बोडिया – १
फिनल्याण्ड – १
नेपाल – १
स्विडेन – १
स्पेन – १
बेल्जियम – १