संघ र प्रदेशको निर्वाचन मंसिरभित्रै गराउने योजनामा सरकार

२० साउन, काठमाडौं – आउँदो मंसिर महिनाभित्रै संघ र प्रदेशको निर्वाचन शान्तिपूर्ण तवरले सम्पन्न गर्ने योजनामा सरकार रहेको गृहमन्त्री जनार्दन शर्माले बताए ।

नेपालका लागि जापानी राजदूत मासासी ओगावासँग गृह मन्त्रालयमा बिहीबार भएको शिष्टाचार भेटमा राजदूत ओगावाले दोस्रो चरणको स्थानीय निर्वाचन शान्तिपूर्ण ढंले सम्पन्न गरेकामा गृहमन्त्री शर्मालाई बधाई दिँदै तेस्रो चरणको स्थानीय, प्रदेश र प्रतिनिधिसभा निर्वाचन पनि शान्तिपूर्ण तरिकाले सम्पन्न गराउन शुभकामना दिए ।

गृहमन्त्री शर्माले भैरहवामा निर्माण भइरहेको गौतमबुद्ध अन्तर्राष्ट्रिय विमानस्थल सञ्चालनमा आएपछि जापानका बौद्ध धर्मावलम्बीको आगमन झनै सहज हुने बताए । उनले जापानी अनुभवका आधारमा उद्धार कार्यमा स्थानीय जनतालाई समेत सहभागी गराउने योजना रहेको बताए।