गाई काटेर खाने तीन जना पक्राउ

८ असार, गुल्मी – प्रहरीले गुल्मीमा गाई काटेर खाएको आरोपमा तीन जनालाई पक्राउ गरेको छ। रुरु गाउँपालिका ५ बम्घा सौरकोटका ५२ वर्षीय डम्बर सार्की, ६३ वर्षीय सन्तबहादुर नेपाली र उनका छोरा २६ वर्षीय अम्मरबहादुर नेपालीलाई प्रहरीले पक्राउ गरेको छ। उनीहरुले मिलेर सोमबार राति पौने आठ बजे गाई काटेको देखिएको श्रृङ्गा प्रहरी चौकी इन्चार्ज मुक्तिप्रसाद पुनले जानकारी दिए। गाउँको एक घरमा बाच्छी दान गर्ने भनेर पत्नीलाई ढाँटेर गाइ काटेको प्रहरीले जनाएको छ। गाई काटेको थाहा पाएपछि डम्बरकी श्रीमतीले प्रहरीलाई खबर गरेकी थिइन्। घटनाको मुचुल्का तयार पारेर प्रहरीले डम्बर र सन्तलाई मंगलबार पक्राउ गरेको जिल्ला प्रहरी कार्यालयले बताएको छ । उनीहरुलाई कसुर ठहरिएमा मुलकी ऐनको चौपाया सम्बन्धी महलको ११ अनुसार १२ बर्ष कैद सजायँ हुने कानुनी व्यवस्था रहेको बताए। उनीहरुलाई हिरासतमा राखेर थप अनुसन्धान गरिरहेको प्रहरीले जनाएको छ।