माइक्रोबसको ठक्करबाट एक पैदलयात्रुको मृत्यु, ६ जना घाइते

२३ जेठ, धादिङ – धादिङको पृथ्वीराजमार्ग अन्तरगत थाक्रे गाउँपालिका–२ सिम्लेमा आज माइक्रोबसले पैदलयात्रुलाई ठक्कर दिँदा एक जनाको ज्यान गएको छ भने ६ जना घाइते भएका छन् ।

भैरहवाबाट काठमाडौं जाँदै गरेको लु १ ज २६७४ नम्बरको माइक्रोबसले सडक पेटीमा हिँडेका यात्रुलाई ठक्कर दिएको थियो । पैदलयात्रुलाई ठक्कर दिँदा थाक्रे गाउँपालिका–२, की ३० वर्षकी बन्दना परियारको ज्यान गएको प्रहरीले बताए । दुर्घटनामा ६ जना घाइते भएका छन् । घाइतेहरुको स्थानीय बासिन्दाले उद्धार गरि काठमाडौंको वीरअस्पताल स्थित ट्रमा सेन्टरमा उपचारका लागि पठाइएको छ ।

घटनापछि स्थानीय बासिन्दाले दिउँसो ३ बजेदेखि पृथ्वीराजमार्ग अवरुद्ध गरि पैदलयात्रुलाई ठक्कर दिने माइक्रो बसमा आगजनी गरिदिएका छन् । दुर्घटना चालकको लापर्वाहीले भएकोले स्थानीय बासिन्दाले सडक अबरुद्ध गर्दै निस्पक्ष छानविनपछि कारबाहीको माग गरेका छन् ।