राष्ट्रपतिले सहमतिको सरकार गठनका लागि दिएको समयसीमा आज सकिँदै

१७ जेठ, काठमाडौं – राष्ट्रपति विद्यादेवी भण्डारीले सहमतिको सरकार गठनका लागि दिएको समयसीमा आज सकिँदैछ । राष्ट्रपतिले बिहीबार नेपालको संविधानको धारण २९८ को उपधारा (२) बमोजिम सात दिनभित्र राजनीतिक सहमतिका आधारमा प्रधानमन्त्रीको निर्वाचन गर्न आह्वान गरेकी थिईन् ।

तर सहमतिको सरकार गठनका लागि कुनै प्रयास नभए पछि आज राष्ट्रपतिले नै सर्वदलीय बैठक बोलाएकी छन् । सर्वदलीय बैठकपछि बहुमतीय सरकार गठनका लागि उनले आह्वान गर्न सक्नेछिन् । यसैबीच आफ्नो नेतृत्वमा बहुमतीय सरकार गठनका लागि नेपाली कांग्रेसका सभापति शेरबहादुर देउवाले प्रयास जारी राखेका छन् ।

नेकपा माओवादी केन्द्रसँग भएको सहमतिअनुसार पुष्पकमल दाहालले सरकारको नेतृत्व छाडिदिएपछि देउवाले प्रयास जारी राखेका हुन् । उनले मंगलबार पनि सर्वदलीय बैठक आह्वान गरेका थिए भने आन्तरिक भेटवार्ता पनि जारी राखेका छन् ।