राष्ट्रका नाममा सम्बोधन गर्दै प्रधानमन्त्रीले भने –देशले जित्यो, जनताले जिते

११ जेठ, काठमाण्डौ – प्रधानमन्त्री पुष्पकमल दाहाल प्रचण्डले विहिबार पदबाट राजीनामा दिएका छन । विहिबार  दिउँसो प्रधानमन्त्री तथा मन्त्रिपरिषद्को कार्यालय सिंहदबारबाट राष्ट्रका नाममा सम्बोधन गर्दै प्रधानमन्त्रीले  राजीनामा घोषणा गरेका हुन । २०७३ साउन १९ गते संसदमा ३ सय ६३ को बहुमत प्राप्त गरी प्रचण्ड दोस्रोपटक मुलुकको ३९ औं प्रधानमन्त्रीका रुपमा निर्वाचित भएका थिए ।

सम्बोधन गर्दै प्रधानमन्त्री प्रचण्डले स्थानीय तहको चुनाब गराएर आफुले मननयोग्य काम गरेको भन्दै पहिलो चरणको चुनाबबाट देशले जितेको, जनताले जितेको बताए । संविधान जारी भएको  र  यो चुनाबले सिमान्तकृत समुदाय न्यायदाताको नयाँ भुमिकामा पुगेको बताए । आफ्नो पालामा राष्ट्रिय अर्थतन्त्रमा समेत सकारात्मक काम भएको प्रधानमन्त्री प्रचण्डको दाबी थियो ।

आफ्नै पालामा २४ वर्ष यताकै उच्च आर्थिक वृद्धिदर भएको,  मूल्यवृद्धि १२ वर्ष यता कै कम  भएको र उज्यालो नेपाल अभियान प्रभावकारी भएकोमा उनले खुसी व्यक्त गरे । भूकम्प पछिको पुनः निर्माणका लागि आफुले गरेको पहललाई स्मरण गर्दै प्रधानमन्त्री प्रचण्डले पहिलो किस्ताको रकम सबै सेवाग्राहीको खातामा पुगिसकेको र बिस्तारै दोश्रो तेश्रो किस्ता लिने सेवाग्राही पनि बढेको बताए ।

आफ्नै पालामा कृषी क्षेत्रको उत्पादन र उत्पादकत्व वृद्धि गर्न, प्रधानमन्त्री कृषी आधुनिकिकरण परियोजना लागू गरेको किसान आयोग गठन गरेको, कृषी विमा र किसान पेन्सन काम पनि अघि बढ्दै गरेको प्रधानमन्त्रीले स्मरण गरे । आफ्नै कार्यकालमा बहुप्रतिक्षित  फास्ट ट्रयाक बन्ने ग्यारेन्टी भएको तथा हुलाकी मार्ग पनि तिब्र गतिमा अगाडी बढिरहेको भन्दै उनले सन्तोष व्यक्त गरे ।

मेलम्चीको पानी दशैं अघि नै काठमाण्डौमा ल्याउने गरि काम बढिरहेको देशका १७ शहरमा मेघा सिटीको काम शुरु भएको पनि बताए । प्रधानमन्त्री प्रचण्डले सात वटै प्रदेशमा एक एक वटा कृषी क्याम्पस बनाउने काम भईरहेको जानकारी दिए भने सबै प्राथमिक स्वास्थ्य केन्द्रमा कम्तिमा २ चिकित्सक पुर्याउने लक्ष्य पनि पुरा हुदै गरेको बताए ।

आफ्नै पालामा गम्भिरखाले रोगको उपचार  निशुल्क भएको स्मरण गर्दै उनले  नेपाली सेना र प्रहरीको अस्पताल सर्वसाधरणका लागि पनि खुल्ला गरिएको पनि जानकारी दिए । प्रधानमन्त्री प्रचण्ड २०६५ साल साउनमा पहिलो पटक प्रधानमन्त्री भएका थिए ।