प्रमुखमा अहिलेसम्मको प्राप्त नतिजाअनुसार  एमाले ४, कांग्रेस ३, माओवादी २, स्वतन्त्र १

१ जेठ, काठमाडौं – अहिलेसम्म प्राप्त नतिजाअनुसार नेकपा एमाले अगाडि देखिएको छ । एमालेले चार, कांग्रेसले तीन,माओवादी केन्द्र दुई, र स्वतन्त्र एक जना गाउँपालिका प्रमुखमा विजयी भएका छन् ।
एमालेका तर्फबाट डोल्पाको से फोक्सुन्डो र काइके गाउँपालिका तथा मनाङको चामे र नेस्याङ गाउँपालिका प्रमखुमा विजयी भएका छन् । काइकेमा अंगद राना, चामेमा लोकेन्द्र घले, नेस्याङमा कान्छा घले निर्वाचित भएका छन् । यसअघिनै डोल्पाको से फोक्सुण्डोमा टाँसी तुञ्दुप गुरुङ निर्विरोध विजयी हुनु भएको थियो ।
कांग्रेस अहिलेसम्म तीन वटा गाउँपालिका प्रमुखमा विजयी भएको छ । मनाङको नारफु गाउँपालिकामा कांग्रेसका मिङमानर छिरिङ लामा यसअघिनै निर्विरोध निर्वाचित भएका छन्। मुस्ताङको लोमान्थाङ गाउँपालिकामा कांग्रेसका सुवर्णकुमार विष्ट विजयी भएको छ । यसैगरी बाग्लुङको तमानखोला गाउँपालिका प्रमुखमा कांग्रेसका जोकलाल बुढा विजयी भएका छन्
माओवादी केन्द्र दुईवटा गाउँपालिकामा वियजी भएको छ । जुम्लाको गोठिचौर गाउँपालिकाको प्रमुखमा माओवादी केन्द्रका हरिबहादुर भण्डारी विजयी भएका छन् । डोलपाको जगदुल्ला गाउँपालिकाको प्रमुखमा माओवादी केन्द्र विजय भएको छ । माओवादी केन्द्रका नरसिंह रोकाया विजयी भएका छन् ।
त्यसैगरी मुस्ताङको दालोमे गाउँपालिकाको प्रमखुमा स्वतन्त्रका उम्मेद्वार राजु बिष्ट बिजयी भएका छन् । बिष्टले कांग्रेसका तेन्जिङ छिरिङ गुरुङ भन्दा दोब्बर बढि मत ल्याएर विजयी भएका छन् । उनले कांग्रेसबाट टिकट नपाएपछि बागीबाट उठेका थिए ।