डोल्पाका दुई मतदान केन्द्र सम्पर्कबिहीन, रसुवामा सञ्चार समस्यामा सुधार

३१ वैशाख, डोल्पा /रसुवा – उपल्लो डोल्पाका दुई मतदान केन्द्र अहिलेसम्म सम्पर्कमा आउन सकेको छैन । छार्काताङसोङ गाउँपालिकास्थित धेराङ र कागकोट मतदान केन्द्रमा सञ्चार समस्याका कारण अहिलेसम्म फोन सम्पर्क हुन नसकेको जिल्ला प्रहरी कार्यालय डोल्पाले जनाएको छ । त्यस स्थानबाहेक उपल्लो अन्य मतदान केन्द्रमा धमाधम मतदान भइरहेको कार्यलयले जनाएको छ ।
त्यसैगरी  रसुवामा अहिलेसम्म ७५ प्रतिशत मतदान भएको छ । दुईदिनदेखि सञ्चारमा आएको गडबडीले सम्पर्कबिहीन भएको लाङटाङको मुन्डु मतदान केन्द्रमा आइतबार दिउँसो सम्पर्क भएको र त्यहाँ ७७ प्रतिशत मतदान भएको मुख्य निर्वाचन अधिकृत रामराजा उप्रेतीले जानकारी दिए ।मौसमले साथ दिएमा मतदान सकिएपछि मुन्डु मतदान केन्द्रको मतपेटिका नेपाली सेनाको हेलिकप्टरमा सदरमुकाम धुन्चे ल्याइने छ । यहाँ कुल ३४ मतदानस्थलमा ४२ मतदान केन्द्र छन् ।
जिल्लाका पाँच गाउँपालिकामा २७ हजार आठ सय ५४ मतदाता छन् ।  शान्तिसुरक्षाको अवस्था मजबुत रहेको र उत्साहपूर्वक मतदान भइरहेको उप्रेतीले बताए ।