चार नगरपालिकामध्ये एक नगरपालिकामा संयुक्त प्यानलको उम्मेदबारी दर्ता

२० बैशाख, भक्तपुर — भक्तपुरका चार वटा नगरपालिकामध्ये एउटा नगरपालिकामा संयुक्त प्यानलको  उम्मेदबारी दर्ता भएको छ । काँंग्रेस पकड क्षेत्रको रुपमा रहेको मध्यपुर थिमि नगरपालिकामा काँंग्रेसविरुद्ध नेपाल कम्युनिष्ट पार्टी (एमाले), नेपाल मजदुर किसान पार्टी र एकीकृत नेपाल कम्युनिष्ट पार्टी माओवदीवीच संयुक्त प्यानलको उम्मेदबारी दर्ता भएको छ।

मध्यपुर थिमिमा संयुक्त प्यानलको रुपमा मेयरमा एमालेका मदनसुन्दर श्रेष्ठको उम्मेदबारी परेको छ । सुयंक्त प्यानलबाट उपमेयरमा नेपाल मजदुर किसान पार्टीका केदार खडकाले उपमेयरको उम्मेदवारी दर्ता गराए । काँग्रेसका पूर्व मध्यपुर थिमि नगर सभापति कष्ट कवेविरुद्ध तीन वटा पार्टीले संयुक्त रुपमा उम्मेदबारी दिएका हुन् ।जिल्लाको चार वटामध्ये सूर्यविनायक नगरपालिकाको मेयरमा महिलाको उम्मेदबारी परेको छ । नेपाल मजदुर किसान पार्टीले सूर्यविनायक नगरपालिकाको प्रमुखमा मनशोभा त्वातीलाई उम्मेदबार उठाएको हो । जिल्लाको चार वटा नगरपालिकामध्ये मेयरमा महिला उम्मेदबार उनकै मात्रै परेको छ ।
भक्तपुर नगरपालिकाको उपमेयरमा ख्वप इन्जिनियर कलेज लिवाली भक्तपुरकी उपप्रचार्य रजनी श्रेष्ठले उम्मेदबारी दर्ता गराएकी छन् । नेपाल मजदुर किसान पार्टीकै तर्फबाट रजनीले उपमेयरमा उम्मेदबारी दर्ता गराएकी हुन्।
भक्तपुर नगरपालिकाको मेयरमा पूर्व सभाषद् एवं नेपाल मजदुर किसान पार्टीका केन्द्रिय सचिव सुनिल प्रजापतिले उम्मेदबारी दर्ता गराएका छन् । पछिल्लो संविधान सभाको निर्वाचनमा सभाषदमा पराजित उनले मेयर पदमा उम्मेदबार दिएका हुन् ।