साझा पार्टीले आफ्ना कार्यकर्तालाई स्थानीय निर्वाचनमा स्वतन्त्र उमेदवारी दिन आह्वान

८ चैत, काठमाडौँ – स्थानीय निर्वाचनमा स्वतन्त्र उमेदवारी दिन नवगठित साझा पार्टीले आफ्ना कार्यकर्तालाई आह्वान गरेको छ। स्थानीय निर्वाचनका कारण दल दर्ता गर्न नपाएको उक्त पार्टीले निर्वाचनमा स्वतन्त्र उमेदवारी दिने नीति लिएको हो।

‘साझा पार्टीको स्थानीय तहको विभिन्न स्तरमा नेतृत्व सम्हाल्ने सम्भावनाका बारेमा सोच बनाएका साथीहरुलाई ‘स्वतन्त्र’ उमेदवारी दिन हामी प्रोत्साहित गर्दछौँ,’ साझा पार्टीले  जारी गरेको विज्ञप्तिमा भनिएको छ।

‘स्वतन्त्र’ उमेदवारी दिँदा पदीय जिम्मेवारीका लागि आवश्यक क्षमतामा सम्झौता नगरिकन समावेशितालाई प्राथमिकता पनि सो पार्टीले आफ्ना समर्थक तथा शुभेच्छुकहरुलाई आग्रह गरेको छ। पार्टी दर्ता भइनसकेको अवस्थामा चन्दा संकलन गर्न नपाइने हुनाले कुनै पनि उमेदवारलाई आर्थिक सहयोग गर्न नसक्ने जानकारी पनि सो पार्टीले दिएको छ।