वाइसिएल निदायाे, उग्रराष्ट्रवादले देश डुबाउने भयाे – प्रचण्ड

१८ माघ, काठमाडौं । प्रधानमन्त्री पुष्पकमल दाहाल प्रचण्डले देशमा राष्ट्रवादका नाममा दक्षिणपन्थी हावा चलेको भन्दै निद्राबाट ब्यूँझन वाईसीएल कार्यकर्तालाई निर्देशन दिएका छन् । साथै उनले केही दलले एकै पटक केन्द्रको चुनाव गरेर संघीयता र समावेशीता उल्टाउन चाहेको आरोप पनि लगाए ।

सोमबार राजधानीमा बाईसीएलको एकता भेलालाई सम्बोधन गर्दै माओवादी अध्यक्ष समेत रहेका प्रधानमन्त्री प्रचण्डले भने, एकथरी शक्तिहरु राष्ट्रवादको नाममा दक्षिणपन्थी हावा चलाउन खोज्दैछन् । अन्धराष्ट्रवादको वकालत गरेर, सामन्ती तत्वसँग साँठगाँठ गरेर गणतन्त्र उल्टाउने, संघीयता लागु हुनै नदिने र धर्मनिरपेक्षता खारेज गराउने प्रपञ्चमा छन् ।’

तर, आफूहरुले हिमाल, पहाड र तराईबीच एकता कायम गरेर राष्ट्रिय एकता बनाउन खोजेको उनले बताए । ‘वास्तविक राष्ट्रवाद त्यो हो, जसले हिमाल, पहाड र तराईलाई जोड्छ । वास्तविक राष्ट्रवाद त्यो हो, जसले सबै जाति, भाषा, संस्कृति, सभ्यता र समुदायको सम्मान र समानताको वकालत गर्दछ’ उनले भने, एउटा भाषा वा समुदायको प्रतिनिधित्व गर्ने, हिमाल र पहाडलाई भड्काएर एक-अर्काका विरुद्ध उभ्याउने सोंच राष्ट्रवादी सोंच हुन सक्दैन । माओवादी नक्कली राष्ट्रवादको पक्षमा छैन ।’

एक समय वाईसीएल जाली फटाहका लागि आतंक र जनताका लागि भरोसाको संगठन भएको भन्दै उनले निद्राबाट ब्यूँझन कार्यकर्तालाई आग्रह गरेका छन् ।

सुरुमा गैरफौजी रहेपनि सेना समायोजन प्रक्रियापछि यसमा फैजी तालिम भएकाहरु समेत आवद्ध भएको भन्दै उनले यस्तो संगठन विरलै बन्ने बताए । पछिल्लो समय उनीहरु तितरवितर हुँदा पार्टी समते कमजोर भएको भन्दै उनले वाईसीएल  कार्यकर्तालार्इ भने, तपाईहरु निद्राबाट ब्यूँझनुस् । दक्षिणपन्थविरुद्ध उभिनुस् ।’

प्रधानमन्त्री प्रचण्डले चुनावमा जानुको विकल्प नभएको भन्दै छिट्टै मिति घोषणा हुने बताए ।