वाइसीएलको दवावपछि गोरखामा सार्वजनिक यातायातको भाडादर समायोजन हुने

गोरखा । योङ कम्युनिष्ट लिग (वाइसीएल)को दवावपछि गोरखामा सार्वजनिक यातायातको भाडादर समायोजन हुने भएको छ । कच्ची सडक कालोपत्रे भइसक्दा पनि कच्चीको भाडादर कायम रहेको भन्दै वाइसीएलले पाँचदिन भित्र जिल्लाका सवारी साधानहरुमा भाडा समायोजन गर्न चेतावनी दिदै आएको थियो । तत्काल नयाँ भाडादर कायम गर्न माग गर्दै असोज ८ गते जिल्ला प्रशासन कार्यालयलाई ज्ञापन पत्र बुझाएपछि सोमवार बसेको जिल्ला स्तरीय यातायात व्यवस्था समितिको बैठकले नयाँ भाडादर कायम गरेको हो ।

यससँगै गोरखा जिल्ला भित्र पक्की सडकमा प्रतिकिलोमिटर ५ रुपैया ३४ पैसा, ग्राभेल सडकमा प्रतिकिलोमिटर ७ रुपैया ८५ पैसा र कच्ची सडकमा प्रतिकिलोमिटर ९ रुपैया ५५ पैसा दर भाडा कायम हुने भएको छ ।

नयाँ भाडा दर निर्धारण भएसंगै वाइसीएल गोरखाका संयोजक सागर श्रेष्ठले संगठनले उठाएका एजेण्डा आमगोरखाबासीहरुको एजेण्डा भएको बताए । जनपक्षिय माग पुरा गरेको भन्दै प्रशासन, यातायात व्यवसायी लगायतका सराकोरवालाहरुलाई धन्यवाद दिदै उनले भने ‘नयाँ भाडादर कायम नभए कडा सर्घषमा उत्रने तयारी हाम्रो थियो । हाम्रो मागको सुनुवाई भएको छ । नयाँ निर्धारण गरिएको भाडादर निशर्त लागू गर्न र कार्यान्वयनका लागि सम्बधित सरोकारवालाहरुलाई आग्रह गर्छौ र जनहितका एजेन्डालाई वाइसीएलले निरन्तर उठाउदै जाने प्रतिवद्धता समेत व्यक्त गर्छौ’।

आमसर्वसाधरणको दैनिक जिवनमा उपयोग हुने यातयात क्षेत्रको विकृति नियन्त्रण गर्न र भाडा दरको बैज्ञानिक समायोजन गर्न वाइसीएलले लामो समयदेखी दबाब दिदै आएको समेत उनले बताए ।

गोरखाको पालुङटार नगरपालिका र सिरानचोक गाउपालिका क्षेत्र भित्रका मध्यपहाडी लोकमार्ग र अन्य सडकखण्ड, गोरखा घ्याम्पेसाल आरुघाट सडक खण्ड लगायत सडकहरु कालोपत्रे भइसकेको लामो समय हुँदा समेत सार्वजनिक भाडादर भने कच्चिकै कायम रहेको थियो ।

सार्वजनिक यातायातले मनोमानी रुपमा पक्की सडकमा कच्चीकै भाडा उठाउदा समेत राज्य र प्रशासन मौन बसेसँगै प्रशासन निरीह जस्तो देखिदै आएकोमा प्रशासनको पछिल्लो कदमले प्रशासन बिहिनताको आभासबाट जनताले छुटकारा पाएको श्रेष्ठ बताउँछन ।