‘कर्पोरट अनर अवार्ड २०२२’ भव्यरुपमा सम्पन्न

काठमाडौं-समाजका विभिन्न क्षेत्रमा योगदान दिएका व्यक्तिलाई ‘कर्पोरट अनर अवार्ड २०२२’ प्रदान गरिएको छ । राजधानीमा मंगलबार आयोजित द लाइफ स्टाइलको आयोजना तथा कलिउड हवको व्यवस्थापन र इशान बाल तथा महिला अस्पतालको प्रयोजनमा भएको कार्यक्रममा अवार्ड वितरण गरिएको हो ।

कार्यक्रमका अध्यक्ष राजन खरेलका अनुसार विभिन्न पेशा तथा व्यवसायको माध्यमबाट राष्ट्रलाई योगदान पुर्‍याएका व्यक्तित्वलाई अवार्ड प्रदान गरिएको हो । उहाँले देशकै उदाहरण बन्न सफल भएका फरक क्षेत्रका विशेष व्यक्तिहरूलाई ‘लेजेण्ड्री अवार्ड’ तथा विभिन्न क्षेत्रमा आबद्ध व्यक्तित्वलाई अवार्डद्वारा सम्मान गरिएको जानकारी गराउनुभयो । पूर्वरक्षामन्त्री तथा प्रतिनिधिसभा सदस्यसमेत रहनुभएका भीमसेनदास प्रधान प्रमुख अतिथिको रुपमा सहभागी हुनुहुन्थ्यो ।

त्यसैगरी विशेष अतिथिमा टोखा नगरपालिका नगरप्रमुख प्रकाश अधिकारी, भक्तपुर नगरपालिकाका प्रतिनिधि, भक्तपुर नगरपालिका २ का वडाध्यक्ष, ख्वाप अस्पतालका प्रतिनिधि, सञ्चारकर्मी भरत बम्जन, चलचित्र निर्देशक माधवराज खरेल, विभिन्न व्यवसायिक क्षेत्रका व्यक्तिको सहभागितामा अवार्ड प्रदान गरिएको अध्यक्ष खरेलले बताउनुभयो ।

कार्यक्रममा प्रमुख अतिथि प्रधानले अवार्ड पाउने तथा सम्मानितलाई बधाई दिँदै सम्मानले सम्बन्धित क्षेत्रमा काम गर्ने व्यक्तिलाई प्रोत्साहन मिल्ने बताउनुभयो । उक्त कार्यक्रममा टोखा नगरपालिकाका नगरप्रमुख प्रकाश अधिकारीले कार्यक्रम नौलो भएको र यस्तो कार्यक्रमले पेशा, व्यवसाय गर्नेहरूलाई हौसला प्रदान गर्ने बताउनुभयो ।