कोरोना भाइरसको घातक स्वरूप देखिएपछि भियतनामले हो चि मिन्ह सहरका पूरै बासिन्दामा परीक्षण गर्ने

काठमाडौँ — कोरोना भाइरसको घातक स्वरूप देखिएपछि भियतनामले हो चि मिन्ह सहरका पूरै बासिन्दामा परीक्षण गर्ने भएको छ । साथै मे ३१ देखि लागू हुने गरी १५ दिनका लागि नयाँ सामाजिक दूरीको मापदण्ड पनि अपनाइने अधिकारीहरुले बताएका छन् ।

केही दिनअघि भारत र बेलायतमा देखिएको कोरोना भाइरसको भेरियन्ट मिश्रित रुपमा भेटिएपछि भियतनामले संक्रमण रोकथाम र नियन्त्रणका लागि तदारुकता देखाएको हो । नयाँ स्वरूपमा भेटिएको कोरोना भाइरस घातक र हावामार्फत तीव्र रुपमा फैलिने किसिमको भएको भियतनामका स्वास्थ्यमन्त्रीले बताएका थिए ।

यसअघि भियतनाममा सात वटा भेरियन्टका कोरोना भाइरस भेटिएको थियो । भियतनाममा बी।१।२२२, बी।१।६१९, डी६१४जी, बी।१।१।७९यूके भेरियन्ट०, बी।१।३५१ र बी।१।६१७।२९इन्डियन भेरियन्ट० भेटिएको थियो ।

भियतनाममा भेटियो कोरोना भाइरसको इन्डियन र यूके भेरियन्टको मिश्रित स्वरूप
धार्मिक गतिविधि बढेपछि भियतनामको व्यापारिक सहरका रुपमा चिनिएको हो चि मिन्हमा संक्रमण बढेको हो । हो चि मिन्हमा एउटा धार्मिक गतिविधिमा सहभागी भएका कम्तीमा १२५ जनालाई कोरोना भाइरसको संक्रमण पुष्टि भएको बताइएको छ । कोरोना संक्रमणको पहिलो लहर रोक्नका लागि भियतनामले चालेको प्रयासलाई उदाहरणीय मानिन्छ । त्यसैले कोरोनाको दोस्रो लहर रोक्न पनि भियतनामले प्रभावकारी कदम चाल्ने अधिकारीले बताएका छन् ।

दैनिक १ लाख परीक्षण क्षमतामा हो चि मिन्हका करिब १ करोड ३० लाख बासिन्दाको कोरोना परीक्षण गरिने अधिकारीले बताएका छन् । सोही क्षमतामा परीक्षण गर्ने हो भने सहरका पूरै बासिन्दाको परीक्षण सकिन चार महिना लाग्छ । त्यस्तै सहरमा पसल र रेस्टुरेन्टहरु बन्द गरिएका छन् । धार्मिक गतिविधि र ठूला भेला समारोहमा पनि रोक लगाइएको छ । १० जनाभन्दा बढीको समूहमा भेला हुन रोक लगाइएको बीबीसीले उल्लेख गरेको छ ।

सन् २०२० को सुरुवातमा भियतनाममा कोरोना संक्रमण देखिएको थियो । कोरोना संक्रमण देखिनेबित्तिकै भियतनामले स्वदेश फर्किने आफ्ना नागरिकबाहेक सबैलाई प्रवेशमा रोक लगाएको थियो । त्यस्तै विदेशबाट फर्कने सबैलाई अनिवार्य क्वारेन्टाइन र परीक्षणको व्यवस्था गरिएको थियो । त्यस्तै व्यापक रुपमा मुलुकव्यापी रुपमा कन्ट्याक्ट ट्रेसिङ र परीक्षण गरेकाले पनि भियतनामले पहिलो लहरबाट आफूलाई जोगाउन सफल भएको थियो ।

पछिल्लो समय कोरोना संक्रमण फेरि फैलिने खतरा भएपछि सरकारलाई खोप अभियानमा वृद्धि गर्न दबाब दिइएको छ । करिब १० करोड जनसंख्या भएको भियतनाममा अहिलेसम्म करिब १ प्रतिशत नागरिकले मात्रै खोपको एक डोज लगाएका छन् । समाचार संस्था रोयटर्सका अनुसार भियतनामले कोभ्याक्स परियोजनाअन्तगर्त २९ लाख डोज कोरोना खोप प्राप्त गरेको छ भने विभिन्न कम्पनीसँग खोप खरिदका लागि पहल गरिरहेको सरकारले जनाएको छ ।

भियतनाममा अहिलेसम्म ७ हजार १ सय ७ जनामा संक्रमण पुष्टि भएको छ । जसमध्ये आधा संख्या त गत अप्रिलयता मात्र पुष्टि भएको हो । त्यस्तै भियतनाममा अहिलेसम्म कोरोना संक्रमणबाट ४७ जनाको मृत्यु भएको छ । अहिले पनि भियतनाममा कोरोना संक्रमणका हिसाबले न्यून संक्रमित भएको मुलुक हो ।