खरिपाटी क्वारेन्टाइन : स्थानीय डराएपछि घर–घरमा प्रजिअ, स्वास्थ्यमन्त्री पनि जाँदै

काठमाडौं – चीनबाट उद्धार गरिएका नेपालीहरुलाई भक्तपुरको खरिपाटीस्थित क्वारेन्टाइनमा राखेपछि कोरोना भाइरस संक्रमणको त्रास वरपर छाएको छ । यही त्रासमा कतिपय स्थानीयले घर छाडेका समाचार सार्वजनिक भएका छन् । यहीबीच, भक्तपुरकी प्रमुख जिल्ला अधिकारी हुमकला पाण्डे जनचेतना जगाउन घरघरमा पुगेकी छन् ।

‘कतिपयले घर छाडे भन्ने सुनियो । के रहेछ भनेर बुझ्न र सम्झाउन हिँजो स्थानीयबासीलाई भेटेका थियौं, आज पनि भेट्छौं हामी,’ उनले अनलाइनखबरसँग भनिन् । स्थानीयबासीलाई भेटेर कोरोना भाइरस संक्रमित व्यक्तिलाई खरिपाटीमा नराखिएकाले नडराउन भनिएको उनले जानकारी दिइन् । खरिपाटीस्थित क्वारेन्टाइनमा राखिएकाहरूको स्वास्थ्य परीक्षण गर्दा कोरोना भाइरस संक्रमणको लक्षण नदेखिएको पाण्डेको भनाइ छ ।