Friday 22nd November 2019

    ईलाका प्रहरी कार्यालय बनेपाको नयाँ भवन शिलान्यास    नवनियुक्त मन्त्रीले लिए शपथ    पत्थर मन    श्रीदेवलाई बेष्ट डिसिप्लेन अफ द ईयर    उत्तराखण्डका मुख्यमन्त्रीले भने : कालापानी भारतकै हो, भारतकै रहन्छ

राजकुमारी हया, जसले दिएको पीडामा कविता लेखिरहेका छन् दुबईका शासक

Friday, July 5, 2019 National Power


‘अब मेरो साथमा रहन तिमिलाई कुनै अधिकार छैन, मलाई केही फरक पर्दैन तिमी मर या बाँच ।’ ‘अब भन्न केही बाँकी रहेन । तिम्रो यो प्राणघातक मौनताले मलाई तनाव दिएको छ । ’

यी पंक्ति कुनै सायर वा कविले लेखेका होइनन् । यस पंक्तिका सिर्जनाकार हुन् दुबईका शासक शेख मोहम्मद अल मकतूम । जसकी श्रीमती राजकुमारी हया बिन्त अल हुसैन दुबई छोडेर लण्डन गएकी छिन् ।

संयुक्त अरब इमिरेट्सको शाही परिवारमा यस्तो हुनु आफैँमा अचम्म लाग्दो घटना हो । राजकुमारी अहिले सेन्ट्रल लण्डनको कुनै ठाउँमा बसेको बताइएको छ । राजकुमारी हया घोडसवारीमा भाग लिने गर्थिन् तर यो वर्ष भएको रोयल एस्कटमा उनी उपस्थित भइनन् ।

राजकुमारी हया आफ्नो ज्यानको खतरा महसुस गरिरहेको बीबीसी स्रोतले उल्लेख गरेको छ । यसको कारण उनी आफ्ना श्रीमानविरुद्ध कानुनी लडाईं लड्ने तयारीमा थिइन् ।

कुन देशकी हुन् राजकुमारी हया ?

राजकुमारी हयाको जन्म सन् १९७४ मे महिनामा भएको हो । उनका पिता जोर्डनका राजा हुसैन थिए । उनकी आमाको नाम आलिया अल–हुसैन हो । राजकुमारी हया तीन वर्षको हुँदा नै उनकी आमाको हेलिकप्टर दुर्घटनामा ज्यान गयो ।

राजकुमारी हयाले आफ्नो बाल्यकाल ब्रिटेनमा बिताएकी हुन् । उनले अक्सफोर्ड युनिभर्सिटीबाट राजनीति, दर्शन र अर्थशास्त्रको अध्ययन पूरा गरेकी छिन् । उनले पुराना केही अन्तर्वार्तामा आफू बाजलाई पाल्न र ठूला मेशिनको प्रयोगमा रुची राख्ने गरेको बताएकी छिन् । यसबाहेक उनले आफू जोर्डनमा ठूलो ट्रक चलाउने लाइसेन्स पाउने एकमात्र महिला भएको दाबी पनि गरेकी छिन् ।

घोडसवारीमा राजकुमारी हया

जब उनी २० वर्षकी भइन् तब उनले घोडसवारीलाई आफ्नो करियरको रुपमा छानेकी थिइन् । घोडसवारीमा राजकुमारी हयाले सन् २००० को ओलम्पिक खेलमा जोर्डनको प्रतिनिधित्व पनि गरेकी थिइन् । उनी उक्त ओलम्पिक खेलमा आफ्नो देशको ध्वाजावाहक पनि थिइन् ।

सन् २००४ को अप्रिल १० मा राजकुमारी हयाले दुबईका शासक र संयुक्त अबर इमिरेट्सका उपराष्ट्रपति एवं प्रधानमन्त्री शेख मोहम्मदसँग विवाह गरिन् । त्यतिबेला राजकुमारी ३० वर्षकी थिइन् । शेख मोहम्मद ५३ वर्षका थिए । राजकुमारी हया शेख मोहम्मदकी छैटौँ श्रीमती थिइन् । उनको विभिन्न श्रीमतीबाट २३ जना सन्तान भएको बताइने गरिएको छ ।

राजकुमारी जस्तै शेख मोहम्मद पनि घोडाको पारखी थिए । उनी गो–डोल्फिन नामको घोडाको तबेलाका मालिक पनि थिए । यी दुईको विवाह अम्मानमा भएको थियो ।

राजकुमारी हया शेख मोहम्मद को साथमा

विवाहपछि राजकुमारी हयाले थुप्रै पटक शेख मोहम्मदसँगको आफ्नो सम्बन्धबारे जानकारी दिँदै आफू अत्यधिक खुशी भएको बताएकी थिइन् । इमिरेट्स वुमेन म्यागजिनको २०१६ को अंकमा राजकुमारी हयाले शेख मोहम्मदबारे भनेकी थिइन्, ‘उनले जे गर्छन् त्यो अद्भूत हुन्छ । म हरेक दिन भगवानलाई धन्यवाद अर्पण गर्छु म उनको यति नजिक छु ।’

किन आयो सम्बन्धमा खटपट?

गएको वर्ष शेख मोहम्मदकी जेठी छोरी शेखा लतिफा देशबाट भाग्ने कोसिस गरिन् । यहीँबाट राजकुमारी हया र शेख मोहम्मदबीचको सम्बन्धमा पनि खटपट सुरु हुन थाल्यो । एउटा भिडियोमा ३३ वर्षकी राजकुमारी शेखा लतिफाले उनको परिवारमा कसैलाई पनि स्वतन्त्रता नभएको र आफूलाई मनपर्ने कुरा गर्ने अधिकार नभएको बताइकी थिइन् । जुन भिडियो संसारभर फैलिएको थियो ।

त्यतिबेला शेखा लतिफा समुद्रको बाटो हुँदै संयुक्त अरब इमिरेट्सबाट भाग्न सफल भएको मिडिया रिपोर्टमा प्रकाशित भए । भाग्नमा उनलाई फ्रान्सेली एक नागरिकले सहयोग गरेको बताइएको थियो । भारतको समुद्री सीमा नजिकैको सेनाले उनलाई रोकेर पुनः दुबई पठाएका थिए ।

शेखा लतिफा

डिसेम्बरमा उनको आयरल्याण्डका पूर्व राष्ट्रपति मेरी रोबिनसनसँग बसिरहेको तस्बिर सार्वजनिक भयो । दुबईको प्रशासनले घर छोडेर भागेकी शेखा लतिफा अन्य देशमा उत्पीडनको शिकार हुने भन्दै दुबईमा नै सुरक्षित राखिएको बताएको थियो ।

यही घटनापछि र उनका श्रीमान र परिवारका सदस्यले उनीमाथि दवाब बढाउन थाले । अवस्था कस्तोसम्म भयो भने उनी आफूलाई दुबईमा असुरक्षित महशुस गर्न थालिन् ।

सम्बन्धविच्छेदको तयारी

शेख मोहम्मदले अहिलेसम्म राजकुमारी हयाले दुबई छोडेको कुनै आधिकारिक बयान दिएका छैनन् । उनले १० जूनमा इन्स्टाग्राममा एउटा धोकासम्बन्धी कविता लेखेका थिए । यतिमात्रे होइन शेख मोहम्मदको आफ्नो नामको एउटा वेब साइट छ जसमा उनी धेरैजसो कविता लेखिरहन्छन् ।

टाइम्स अफ लण्डनको एक रिपोर्ट अनुसार राजकुमारी हयासँग उनका ११ र सात वर्षका दुई सन्तान पनि भागेका छन् । यी बच्चाहरुको नाम शेख जायद र शेखा अल जलिला बताइएको छ ।

शाही परिवारको एक नजिकको स्रोतले बीबीसीलाई दिएको जानकारी अनुसार राजकुमारी हया ब्रिटेनमा राजनीतिक शरण लिने कोसिस गरिरहेकी छिन् । साथै उनी शेख मोहम्मदसँग सम्बन्धविच्छेद लिने तयारीमा पनि छिन् ।अहिले शेख मोहम्मद लगातार कविता लेखिरहेका छन् । उनले केही समय अघिमात्रै लेखेका छन् ।

‘मलाई एउटा पीडा भएको छ जुन कुनै औषधिले निको हुँदैन,
कसैबाट पनि यसको उपचार छैन ।’

– बीबीसी हिन्दीबाट