चलचित्र ‘साङ्लो’ लाई गाउँपालिकाको १० लाख

काठमाण्डौं – चलचित्र ‘साङ्लो’ को निर्माणकार्य हुदै गर्दा निर्माणका लागि डोटीको जोरायल गाउँपालिकाले १० लाख दिने भएको छ । जेठ २७ गते बसेको कार्यपालिकाको बैठकले यो निर्णय गरेको हो । सुपरस्टार विराज भट्टले निर्देशनमा हात हालेको फिल्म ‘साङ्लो’ को अहिले डोटीमा छायांकन भइरहेको छ ।

फिल्मलाई गाउँपालिकाले विकास निर्माणको बजेटबाट १० लाख दिने भएपछि सो निर्णयको अहिले सर्वत्र विरोध भइरहेको छ । गाउँपालिकाका अध्यक्ष दुर्गादत्त ओझा ‘पर्यटन प्रवर्द्धन’ को शिर्षकमा उक्त रकम फिल्मको निर्माण टिमलाई दिन लागेको बताएका छन् । रोचक कुरा त फिल्ममा उनको पनि अभिनय छ । उनले फिल्ममा अभिनेत्री निकिताको पिताको भूमिका निभाएका छन् ।

गाउँपालिका अध्यक्ष ओझाले फिल्म खेल्नु अपराध नभएको बताउँदै कथाले मागेका कारण आफूले अभिनय गरेको बताए । उनी १० लाख निर्माताको खल्तीमा सुटुक्क नहालेको पनि बताउँछन् । उनी भन्छन्, ’फिल्मको छायांकनका लागि आएको टिम ठूलो छ । खान, बस्न र यातायातको खर्च स्वरुप १० लाख दिने निर्णय गरेका हौं ।’ गाउँपालिकाले दिएको सो रकमको बारेमा अभिनेता विराजले भने कुनै जानकारी दिएका छैनन् ।