चलचित्र कलाकार संघमा रविन्द्रको पुनरागमन

काठमाडौं – नेपाल चलचित्र कलाकार संघमा रविन्द्र खड्का भारि मतले अध्यक्षमा निर्वाचित भएका छन् । संघमा पहिला पनि अध्यक्ष भइसकेका खड्काको पुनरागमन भएको छ । संघमा खड्काको प्यानलबाट उम्मेदवारी दिने उपाध्यक्षका उम्मेदवार विनोद कुमार भट्टराईबाहेक सबै विजयी भएका छन् । खड्काले आफ्नो प्रतिद्वन्द्वी सरिता लामिछानेलाई ५७ मत अन्तरले हराएका हुन् । खड्काको पक्षमा २१८ र लामिछानेलाई १६१ मत झरेको थियो ।

उपाध्यक्षमा अभिनेत्री रेजिना उप्रेतीले २४३ मत ल्याउँदै विजयी हासिल गरिन् भने अर्का उपाध्यक्षका उम्मेदवार सानु कुमार ताम्राकारले १७५ मत ल्याई विजयी भए । उपाध्यक्ष उम्मेदवारहरु मनोज केसी र विनोद भट्टराईले क्रमशः १४२ र ९६ मत पाएपनि हार बेहोरे । महासचिवमा चेत बहादुर सिंहले १८७ मत ल्याएर विजयी बने भने प्रतिद्वन्दी सञ्जय खतिवडालाई १५६ मत प्राप्त भयो ।

यस्तै, सचिवमा पनाह अधिकारीले १९४ मत ल्याएर विजयी भइन् । प्रतिद्वन्दी कविता गेलाल १६९ मत ल्यापनि २५ मतान्तरले पराजित हुनु पुगिन् । अध्यक्षमा निर्वाचित भएका खड्का प्यानलका सुनिल कटुवाल कोषाध्यक्षमा निर्विरोध चयन भइसकेका छन् । यस्तै, सह–कोषाध्यक्ष पदमा अभिनेत्री पवित्रा आचार्यले २२० मत ल्याएर जित हासिल गरिन् । उनका प्रतिस्पर्धी डि।बि बम्जनले १३३ मत मात्रै पाएका थिए । शनिबार भएको कलाकार संघको निर्वाचनमा ३८७ जना कलाकारले मतदान गरेका थिए ।

त्यस्तै, १० जना निर्वाचित सदस्यमा शितल केसीले सर्वाधिक मत ल्याएका छन् । अन्य ९ सदस्यतर्फ जयकिशन बस्नेत, गोपाल नेपाल, शारदा नेपाल, उद्धव भट्टराई, जीवन थापा, धर्मानन्द आचार्य, धनराज केसी, रोहित रुम्बा र पवनप्रसाद खतिवडाले विजयी हासिल गरे ।
अध्यक्षमा निर्वाचित भएपश्चात तीन वर्षे कार्यकालको नेतृत्व गर्ने जिम्मेवारी पाएका खड्काले कलाकार संघलाई कलाकारहरुको साझा संस्थाको रुपमा अघि बढाउने प्रतिवद्धता व्यक्त गरे । उनले भने– ‘तीन वर्षको कार्यकालमा मैले गरेका प्रतिवद्धताहरु पूरा गरेरै छाड्छु । निर्वाचित कार्यसमितिको पहिलो काम संघको भवन निर्माण गर्ने हुनेछ । यो कलाकारहरुको माग र आवश्यकता पनि हो ।’ उनले अध्यक्षमा पराजित भएकी सरितालाई पनि आफूले सम्मानका साथ संघमा राख्ने बताए ।

निर्वाचनमा पराजित भएपनि सरिताले अध्यक्षमा निर्वाचित खड्कालाई सौहार्द मनले खादा र फूलको बुके दिंदै बधाई तथा शुभकामना दिइन् । सरिताले अध्यक्षमा ग्रैह कलाकार नआएकोमा खुसी व्यक्त गर्दै रविन्द्र दाईले जित्नु भनेको सबै कलाकारहरुको जित हो र उहाँको जितले आफु दुःखी नभएको प्रतिक्रिया दिइन् ।