योजना कार्यान्वयनमा देशकै उत्कृष्ट उपमहानगरपालिका

डोटी – नगरविकास कोषबाट सञ्चालित योजनाहरु कार्यान्वयनमा कैलालीको धनगढी उप-महानगरपालिका देशकै पहिलो भएको छ । नगरविकास कोषले देशमा रहेका २१७ वटा नगरपालिकाहरुमध्ये धनगढी कार्य सम्पादन, कार्यान्वयनका उत्कष्ट भएको हो । नगरविकास कोषले आफ्नो ३१ औं वार्षिकोत्सव कार्यक्रममा धनगढी उप-महानगरपालिकालाई सम्मान गरेको छ ।

कार्यक्रममा धनगढी उप-महानगरपालिकाका प्रमुख नृपबहादुर वडलाई सम्मानपत्र प्रदान गरिएको छ । शहरी विकासमन्त्री महम्मद इश्तियाक राईले उपमहानगर प्रमुख वडलाई प्रमाणपत्र प्रदान गरेका हुन । कार्यक्रममा शहरी विकासमन्त्री राईले धनगढी उप-महानगरपालिकाबाट सबैले सिक्नुपर्ने बताए । उनले भने, ‘स्थानीय तह बिच राम्रा सिकाइहरु हस्तान्तरण गरिनु पर्छ,’
उत्कृष्ट नगरपालिकाको रुपमा सम्मान ग्रहण गर्दा आफूहरुलाई थप हौसला प्राप्त भएको नगरप्रमुख वडले बताए । उनले कार्य सम्पादनका उत्कृष्ट काम गर्न सहयोग गर्ने नगरपालिकाका जनप्रतिनिधि र कर्मचारीहरुलाई धन्यवाद दिए ।