गीत रेकर्ड भएको २३ वर्ष पछि म्यूजिक भिडियो

काठमाण्डौ – कुनै दिन गायक राजेश पायल राईलाई चर्चामा ल्याएको गीत “वैगुनी रैछौ मायालु” को २३ वर्ष छि म्यूजिक भिडियो निर्माण भएको छ । परिवर्तित समयको माग सँगै अब गीत सुन्ने मात्रै नभएर हेर्ने प्रचलन बढेकोले भिडियो निर्माण गरिएको गीतका गीतकार भरत बमजनले बताउनु भयो ।

बमजनको रचना र बसन्त मुकारुङ्गको संगीत रहेको सो गीतले आफ्नो समयमा निकै चर्चा बटुले पनि भिडियो निर्माण भएको थिएन । भिडियो निर्माण पछि गीतले नयाँ जीवन पाउने र फेरि एकपटक चर्चाको शिखर चुम्ने विश्वास निर्माण समूहले गरेको छ । गीतको छांयाङ्कन रेशम दर्लामीले गरेका हुन भने अभिनय प्रतिभाशाली नायक एवं मोडेल श्रीदेव भट्टराई, पुरुषोत्तम नेपाली (सानु) र बर्षा चौलागाइले गरेका छन् ।

निर्देशन नेपाल टेलिभिजनका चर्चित सञ्चारकर्मी दिपक समिरले गरेका छन् । यो उनको म्यूजिक भिडियो निर्देशनमा पहिलो हो । अधिकांश छांयाङ्कन ललितपुरको लेलेमा गरिएको भिडियोको फरक कथा अत्याधुनिक प्रविधि एवं कलाकारहरुको जीवन्त अभिनयले गर्दा दर्शकले मन पराउने विश्वास निर्देशक समरिले व्यक्त गरे । भिडियो हाल सम्पादनमा रहेको र केही दिनमा सार्वजनिक गरिने तयारी गरेको छ ।