Sunday 25th October 2020

    जनचेतना नेपालद्वारा काभ्रेकाे माझी गाउँमा दशैंको शुभकामना साँट्दै ४९ परिवारलाई खाद्यान्न वितरण    थप ४४९९ जनामा कोरोना संक्रमण पुष्टि, संक्रमितको संख्या डेढ लाख नाघ्यो    अनलाइन सुपर किड्स डान्स एंड सिन्गिंग कोम्पेटिशन सम्पन्न    ओली सरकार भारतसँग सम्बन्ध सुदृढ बनाउँदै    एकैदिन ५ हजार ७४३ जनामा कोरोना संक्रमण पुष्टि

भन्नुहोस् त, तपाईसँग भएको सबैभन्दा मूल्यवान् चिज के हो ?

Thursday, May 31, 2018 National Power


१७ जेठ – सोच्नुहोस् त, तपाईंको एउटा हातको मूल्य कति होला रु एक लाख, पाँच लाख  ?  के तपाईं आफ्नो औंलाहरु दुई लाख रुपैयाँमा बेच्न चाहनुहुन्छ ? आँखा नि ? कति रुपैयाँमा बेच्न तयार हुनुहुन्छ रु २० लाख रु वा त्यो भन्दा कति बढी ? यी प्रश्नहरु मन्थन गर्दा तपाईं पक्कैपनि भावशून्य हुनुभयो । अर्थात तपाईंसँग यी प्रश्नहरुको कुनै जवाफ छैन । जवाफ एउटै छ, यी कुराहरुको कुनै मोल छैन । अर्थात अनमोल छ ।

तपाईंसँग भएको मोटरसाइकल दुई लाखमा खरिद गर्नुभएको थियो ।

के त्यसलाई तीन लाखमा बेच्न चाहनुहुन्छ ?

किन नचाहनु ? यो त गजब कुरा हो । तपाईसँग जुन मोबाइल छ, त्यो एक लाखमा बेच्ने हो ?

पक्कै पनि ।

तपाईंसँग भएका हरेक भौतिक बस्तु बिक्री गर्न सक्नुहुन्छ, यदि त्यसको उचित मोल पाउनुभयो भने । तर, शरीरको कुनैपनि अंग बेच्न सक्नुहुन्न । किनभने शरीर अनमोल छ । शरीर कति महत्वपूर्ण छ ? कति मूल्यावान् छ ? यो कुरा त तपाईंले अनुभूत गर्नु नै भयो । तपाईंको शरीरको एक-एक अंग, जो गुमाएपछि फेरि प्राप्त हुँदैन । र, यो जीवन पनि तपाईंले फेरि पाउनुहुन्न । कति मूल्यावान् जीवन ?

सम्झनुपर्ने कुरा के पनि भने, संसारका हरेक व्यक्ति धनी बन्न चाहन्छन्, तर, आफ्नो शरीरको मूल्यमा होइन । दुनियाँका मानिस सफल हुन चाहन्छन्, तर आफ्नो स्वाथ्यको मूल्यमा होइन । किनभने सबैका लागि सबैभन्दा मूल्यवान् बस्तु उसको शरीर हो । अर्थात, जसको स्वास्थ्य राम्रो छ, ऊ आफैमा सफल हुन् ।

जतिसुकै पैसा खर्च गरेर पनि तपाईंले आफ्नो लागि अर्को शरीर खरिद गर्न सक्नुहुन्न । जतिसुकै खर्च गर्नुहोस्, तर तपाइले त्यसको बदलामा राम्रो स्वास्थ्य खरिद गर्न सक्नुहुन्न ।

सोध्नुहोस् आफैंलाई यी प्रश्न

भनाईको सार के हो भने, तपाईंको जीवनको सबैभन्दा मूल्यवान् चिज नै तपाईंको शरीर हो, स्वास्थ्य हो । तर, शरीर यति मूल्यवान् हुँदाहुँदै पनि तपाईं किन यसलाई नजरअन्दाज गर्नुहुन्छ ? के तपाईंले आफ्नो शरीर एवं स्वास्थ्यका लागि केही गरिरहनुभएको छ  ? शरीरलाई स्वस्थ राख्नका लागि के-कस्ता तरिका अपनाउनुहुन्छ  ?

सोच्नुहोस् त, तपाईं दिनमा कति पटक आफ्नो शरीर वा स्वास्थ्यको बारेमा घोत्लिनुहुन्छ ? कति समय स्वास्थका लागि खर्चनुहुन्छ ?  यो प्रश्न तपाईंका लागि कठिन हुनसक्छ । किनभने, हामी काम, करियर, पैसा, परिवार, आफन्त, समाज सबैको बारेमा सोच्दा सोच्दै आफुलाई भुल्न पुग्छौं । आफ्नो शरीरलाई घोट्छौं, दुख दिन्छौं । तर, विश्राम दिदैनौं । पैसा र करियरको चक्करमा यसरी लाग्छौं, मानौ शरीर केवल घोडा मात्र हो ।

अचम्मलाग्दो त के भने, तपाईं आफ्नो गाडी, मोटरसाइकलको ख्याल गर्नुहुन्छ । कुनै इन्जिन खराब हुनसाथ त्यसको मर्मत गर्नुहुन्छ । समय-समयमा सर्भिस सेन्टरमा पुर्‍याउनुहुन्छ । धोइ-पखाली गर्नुहुन्छ । अब आफैलाई एउटा प्रश्न गर्नुहोस्, के तपाईंले यसैगरी आफ्नो शरीरको पनि उचित रेखदेख गरिरहुनभएको छ ?

हेर्नुहोस् फर्केर आफ्नै दिनचर्या

हामी त चाहन्छौं कि दिनभर पैसाकै खातिर दौडिरहूँ । बिहान उठ्छौं, हामीसँग मनतातो पानी पिउने फुर्सद हुँदैन । फेसबुक खोलेर करियर, पैसाको बारेमा कुरा गर्न थाल्छौं । केवल ४५ मिनेट व्यायाम गर्ने समय हामीसँग हुँदैन । मर्निङ वाक गर्ने, व्यायाम गर्ने, योग-ध्यान गर्ने समय नै हुँदैन । बरु, त्यो समयमा हामी चिया र चुरोटको सर्को लिदै घरजग्गा खरिद-बिक्री वा आफ्नो पदोन्नतीका विषयमा चर्चा गर्छौं ।

बिहान उठेर हामीलाईं ब्रेकफास्ट गर्न झन्झटिलो लाग्छ । ब्रेकफास्टका लागि लाग्ने खर्च र समय नै हामी जुटाउन कन्जुस गछौर्ं । ब्रेकफास्ट गर्नुभन्दा तात्तातो दुधको चिया पिएर राजनीतिक गफ गर्न बढी स्वाद लाग्छ हामीलाई ।

तपाईंसँग करोडौं व्यांक ब्यालेन्स होला । तपाईंसँग आलिसान महल होला । तपाईंसँग आरमदायक गाडी होला । नोकरचाकर होलान् । केही कुराको कमी नहोला । तर, यी कुराहरुबाट त्यसबेला मात्र तपाईंले आनन्द प्राप्त गर्न सक्नुहुनेछ, जब तपाईंको शरीर स्वस्थ्य हुनेछ ।

दिनभर शारीरिक रुपले सक्रिय हुन जाँगर चल्दैन । आफ्नै अगाडिको फाइल ल्याउनरपुर्‍याउन पनि हामीलाई सहयोगी चाहिन्छ । कुर्सीमा बसीबसी सबै काम फत्ते गर्न मन लाग्छ । सानोतिनो घरायसी काम गर्न पनि जाँगर चल्दैन । न हामीलाई कुचो लगाउन मन लाग्छ, न करेसाबारीमा गएर गोडमेल गर्न नै । बरु, त्यो समयमा कुनै पत्रिकामा आँखा डुलाउँदै चिया र चुरोट तान्न मन लाग्छ ।

दिनभर हाँस्न, पानी पिउन पनि हामी कञ्जुस्याँई गर्छौं । साँझ घर फर्केपछि सूर्योस्त अघि नै खाना खाने रुची हुँदैन । राती अबेरसम्म बस्छौं । कसैले मदिरापानको अफर गरे, त्यतै रमाउँछौं । यसरी बित्ने दिनचर्यामा हामीले कहाँ आफ्नो शरीरका लागि सोच्यौं, हामीले आफ्ना स्वास्थ्यका लागि के गर्‍यौं ?

शरीरलाई स्वस्थ्य राख्न सुपाच्य खानुपर्छ, सन्तुलित खानुपर्छ, अल्पहारी हुनुपर्छ, सरसफाईमा ध्यान दिनुपर्छ, व्यायाम गर्नुपर्छ, मौसमी फलफूल खानुपर्छ, खुसी हुनुपर्छ, तनावमुक्त हुनुपर्छ । तर, हामी स्वास्थ्यका लागि यी केहीपनि गर्दैनौं ।

तपाईंको मिर्गौला कुन दोकानमा पाइन्छ ?

अब खराब दिनचर्या, हेलचेक्राईको कारण तपाईंको शरीर कमजोर हुन्छ । रोग लाग्छ । शरीरका अंगहरु खराब हुन थाल्छ । मिगौर्ंलामा समस्या देखापर्छ । खराब हुँदै गएको मिगौंला बदल्नका लागि कहाँ जानुहुन्छ ? के यो बजारमा खरिद गर्न पाइन्छ ?

तपाईंका अंगहरु जब खराब हुन्छन्, चिकित्सा विज्ञानसँग त्यसको क्षणिक समाधान होला । तर, त्यो दीर्घकालिन हुँदैन । तपाईंले जन्मजात प्राकृतिक रुपमा प्राप्त गरेको अनमोल शरीर कहीँ, कतै पाउनुहुन्न । कुनैपनि मूल्यमा । तर, यति अनमोल जीवनलाई तपाईं किन वेवास्ता गरिरहनुभएको छ ?

स्वास्थ नै सम्पति

पूर्खाहरुले भन्ने गर्छन्, स्वास्थ नै सम्पति हो । चाहे तपाईंले अथाह सम्पति कमाउनु होला, तपाईंसँग करोडौं व्यांक ब्यालेन्स होला । तपाईंसँग आलिसान महल होला । तपाईंसँग आरमदायक गाडी होला । नोकरचाकर होलान् । केही कुराको कमी नहोला ।

तर, यी कुराहरुबाट त्यसबेला मात्र तपाईंले आनन्द प्राप्त गर्न सक्नुहुनेछ, जब तपाईंको शरीर स्वस्थ्य हुनेछ । तपाईं तन्दुरुस्त हुनुहुनेछ । निरोगी हुनुहुनेछ ।

तपाईंको जागिरमा पदोन्नती भएको होस् वा तपाईंले कुनै जग्गा कारोबारबाट लाखौं हात पारेको होस्, ति कुराले तबमात्र खुसी दिन्छ, जब तपाईं आफुले आर्जन गरेको कुरालाई भोग गर्नका लागि सक्षम हुनुहुन्छ ।

तपाईंसँग आरमदायक कार छ । तर, विन्दास लङ ड्राइभमा जाने सामथ्र्य छैन भने, कार हुनुको के अर्थ भो । तपाईंको भान्सामै थरीथरीका व्याञ्जन पाक्छ । तर, तपाईं उच्च रक्तचाप, मधुमेहले ग्रसित हुनुहुन्छ भने त्यसको स्वाद कसरी लिनुहुन्छ ?

भनाईको अर्थ के हो भने, हामी सम्पति भन्छौं, करियर भन्छौं, घरजग्गा भन्छौं, गाडी भन्छौं, तर यी सबैकुरा प्राप्तिका लागि त्यती अन्ध नहुनुहोस् कि, शरीर एवं स्वास्थ नै कमजोर होस् । किनभने तपाईले घर, गाडी, जग्गा जगेर्ना गर्नुभन्दा शरीरलाई बलियो, तन्दुरुस्त, स्वस्थ्य राख्नुपर्छ । तब पो, तपाईले आर्जन गर्ने भौतिक सुखले आनन्द दिन्छ । तब पो तपाईले पाउने सफलताको सुखानुभूत गर्न सक्नुहुन्छ ।