गरु सुकर्म

तिमी राम बन्नू म सीता बनूँला
 सपार्दै म आत्मा उदाई रहूँला ।
 दुबै एक बन्दै गरौंला सुकर्म
 यही मंत्र जप्दै बनोस् पूर्ण जन्म ।।

पुकार्दै म द्यौता गरूँ काम राम्रो
 यही कामले लेखियोस् नाम राम्रो ।
 म देखूँ सदा देव द्यौता पुजारी
 म डाकूँ सधैँ स्वर्ग धर्ती पुकारी।।

रसीला र मीठा नयाँ गीत गाऊँ
 यही देशबासी संगै प्रीत लाऊँ ।
 फलाऊँ यहीँ अन्न भर्ने भकारी
 यहीँ पोख्न पाऊँ म माटो सिँगारी ।।

सजाई म डाडा पखेरा फुलाऊँ
 बनी निर्झरा भीर पाखा सुसाऊँ ।
 चखेवा र डाफे रहून यो बनैमा
म हेर्दै रमाई बसूँला मनैमा ।।

सधैँ चित्तमा होस् पियारो स्वदेश
 बनोस् ढुक्ढुकी झैँ स्वभाषा स्वभेष ।
 मलाई सधैँ लाग्छ नेपाल राम्रो
 यही नै छ संसारमा स्वर्ग हाम्रो ।।

म बाचूँ यहीँ भूमिमा नित्य हाँस्तै
 रमाऊँ यहीँ मारुनी नाच नाच्तै ।
 म रोदी जमाई रमूँ देउडामा
 भनूँ नित्य प्यारी म नेपाल आमा ।।




भावना न्यौपाने (भवानी)