२८ भदौ, झापा – झापामा करेन्ट लगाएर माछा मार्ने क्रममा मंगलबार एक जनाको मृत्यु भएको छ । इलामको फाकपोकथुम स्थायी घर भई हाल दमक–१, रवी स्टेण्डमा भाडामा बस्दै आएका २५ वर्षीय हेमबहादुर मगरको करेन्ट लागेर ज्यान गएको हो । दिउँसो प्लटिङ गरेको खाली जग्गामा करेन्ट प्रवाह गरी माछा मार्ने क्रममा उनको मृत्यु भएको इलाका प्रहरी कार्यालय, दमकले जनाएको छ । करेन्ट लागेर गम्भीर घाइते भएका उनलाई उपचारका लागि स्थानीय लाइफलाइन अस्पताल लैजाने क्रममा बाटैमा मृत्यु भएको प्रहरीले जनाएको छ ।