लगातार वर्षाका कारण घरमा क्षति

१९ साउन, ताप्लेजुङ – लगातारको वर्षाका कारण ताप्लेजुङमा पहिरोले क्षति पुर्‍याउन थालेको छ । पहिरोका कारण पछिल्ला दुई दिनमा तीन घरमा क्षति पुगेको छ भने चार घर उच्च जोखिममा परेका छन् ।

गएरातिको अविरलवर्षापछि पहिरो खस्दा फुङ्लिङ नगरपालिका–१० र ४ मा दुई घरमा भत्किएको छ भने आठराई त्रिवेणी गाउँपालीका–१ निगुरादिनमा एक घर भत्किएको प्रहरीले बताएको छ ।गएरातिको वर्षापछि खसेको पहिरोले फुङ्लिङ नगरपालीका–४ की छत्रमाया लिम्बुको घर भत्काएको छ भने आठराई त्रिवेणी गाउँपालिका–१ का भीमवहादुर विकको घर पनि पहिरोले भत्काएको स्थानीयवासीले जानकारी दिए । पहिरो जानसाथ घरमा भएका विक र लिम्बुका परिवार भागेकाले मानवीय क्षति भने नभएको जिल्ला प्रहरी कर्यालय ताप्लेजुङले जनाएको छ ।

उता फुङ्लिङ नगरपालिका–१० भालुगौडेमा भने बुधबार विहान पहिरो झर्दा कृष्णबहादुर भट्टराईको घर भत्किएको थियो । बुधबार विहान र राति गएको पहिरोका कारण विस्थापित तीन परिवार अहिले आफन्तको सरणमा बसेका छन् । भट्टराईका छिमेकी नरबहादुर भट्टराई, टेकमान भट्टराई र भक्ति हाङ फुरुम्बु लिम्बुको घर पनि पहिरोको जोखिममा रहेका छन् । तीनै स्थानमा पहिरोका कारण १० लाख बढीको क्षति भएको प्रहरीले प्रारम्भिक अनुमान गरेको छ ।