भोटेकोशीमा बनाइएको लार्चा पुल पहिरोले बगायो

९ साउन, काठमाडौं – गएराति परेको अविरल वर्षासँगै आएको पहिरोले सिन्धुपाल्चोकको भोटेकोशी माथिको पुल बगाएको छ । बाह्रबिसे भन्दा झण्डै २४ किलोमिटर दूरीमा रहेको कोदारी राजमार्गमा पर्ने भोटेकोशी माथि बनाइएको लार्चा पुल पहिरोले बगाएको हो ।

पहिरोले पुल बगाएपछि तातोपानी गाउँपालिकाका दुई वडासँग सम्बन्ध विच्छेद भएको छ । तत्काल बेलिब्रिज बनाउन नसके त्यहाँ खाद्यान्न लगायत अत्यावश्यक वस्तुको अभाव हुन सक्ने सिन्धुपाल्चोकमा प्रमुख जिल्ला अधिकारी अन्तरबहादुर सिलवालले जानकारी दिए । उनीसहित सुरक्षा निकायको टोली अहिले स्थलगत अध्ययनका लागि पहिरो प्रभावित क्षेत्रमा जाँदैछ ।

पहिरो खसेपछि भोटेकोशी आंशिक थुनिएकोमा अहिले पानीको निकास हुन थालेको उनले बताए । भोटेकोशी नदी विस्तारै सामान्य बन्ने क्रममा रहेको प्रमुख जिल्ला अधिकारी सिलवालले बताए । पानी पर्नासाथ नदीमा पानीको बहाव बढ्न सक्ने हुँदा दोलालघाटसम्म नै खतरा हुन सक्ने हुँदा सतकर्ता अपनाउन उनको सुझाव छ । यसअघि तीन वर्ष अघि साउन महिनामा सिन्धुपाल्चोकको जुरेमा पहिरो जाँदा १४५ जनाको ज्यान गएको पुष्टि थियो ।