Friday 26th February 2021

    संसद पुनर्स्थापनापछि प्रधानमन्त्रीले बोलाए मन्त्रिपरिषद् बैठक    वामदेव विहानै खुमलटारस्थित प्रचण्ड निवास पुगे    महेश बस्नेतको दाबी : प्रधानमन्त्रीलाई केही धक्का लागेको छैन, प्रचण्ड-माधवले खाएको लड्डु अब तितो हुन्छ    संसद विघटन गर्ने प्रधानमन्त्रीको विशेषाधिकार हटाएको कि लुकाएको ?    प्रचण्ड भन्छन्- राष्ट्रिय सहमतिका साथ अघि बढ्छौं, ओलीसँग पनि सम्वाद हुन्छ

भारतसँगको सीमा ७२ घण्टा बन्द

Tuesday, June 27, 2017 National Power


१३ असार, काठमाडौं – स्थानीय तहको निर्वाचनलाई मध्यनजर गरेर सोमबारदेखि भारतसंग सीमा जोडिएको नाकामा आवतजावत बन्द गरिएको छ ।

निर्वाचन सुरक्षालाई ध्यानमा राखेर झुलाघाट सीमा नाकामा आवतजावत बन्द गरिएको बैतडीका प्रमुख जिल्ला अधिकारी तुलसीराम पौडेलले जानकारी दिए । भारतसँग सीमा जोडिएको नाकाबाट चुनावी सुरक्षालाई प्रभाव पार्न सक्ने गतिविधि हुनसक्ने भन्दै सीमानाका बन्द गरिएको हो । सोमबारदेखि असार १५ गते बिहीबार बिहान ७ बजेसम्म सीमानाका बन्द रहनेछ ।

निर्वाचनलाई मध्यनजर गर्दै भारतसँग सीमा जोडिएका इलामका सीमा नाकाहरू ७२ घण्टाका लागि बन्द गरिएको छ । भारतसँग सीमा जोडिएका पूर्वका पशुपतिनगर, छब्बिसे, हिले, मानेभञ्ज्याङलगायतका एकदर्जन भन्दा बढी नाका बन्द गरिएको हो । निर्वाचनको समयमा सीमा क्षेत्रबाट कुनैपनि अप्रिय घटना नहोस् र निर्वाचनलाई स्वच्छ, निष्पक्ष र भयरहित तरिकाले सम्पन्न गर्न सीमा नाका बन्द गरिएको सुरक्षा समितिका संयोजक प्रजिअ जनकराज दाहालले बताए ।

दाहालका अनुसार जिल्ला सुरक्षा समितिले अहिले निर्वाचनलाई भयरहित र निष्पक्ष उद्देश्यले सुरक्षा रणनीति पनि तयार पारिएको छ । नेपाल प्रहरी, सशस्त्र प्रहरी सीमा क्षेत्रमा तैनाथ छन् । सीमा क्षेत्रमा लागुऔषध नियन्त्रण, मदिरा निषेध, हातहतियार ओसारपसार, आपराधिक गतिविधि, चोरी तस्करीलगायत घटना हुन नदिन विशेष निगरानी बढाइएको सुरक्षा समितिले जनाएको छ ।

यस्तै निर्वाचनलाई शान्तिपूर्ण रुपमा सम्पन्न गर्नका लागि बैतडीमा सर्वपक्षीय बैठक बसेको छ । सोमबार प्रमुख जिल्ला अधिकारी तुलसीराम पौडेलको अध्यक्षतामा बसेको बैठकमा मुख्य निर्वाचन अधिकृत, निर्वाचन आयोगले खटाएको अनुगमन समितिका संयोजक, राजनैतिक दलका प्रमुख एवं प्रतिनिधिहरुको सहभागिता रहेको थियो । बैठकमा चुनावको सुरक्षा व्यवस्था पूर्ण तयार भएको जानकारी गराइएको प्रमुख जिल्ला अधिकारी पौडेलले बताए । यस्तै, मौन अवधि शुरु भएकाले मौन अवधिको पूर्ण पालनाका लागि आग्रह गरिएको प्रमुख जिल्ला अधिकारी पौडेलले जानकारी दिए ।

मतदान सम्पन्न भइसकेपछि केही स्थानका मतपेटिकाहरु हेलिकोप्टरबाट ढुवानी गर्ने अवस्था आएमा हेलिकोप्टरमा एजेण्टहरुका लागि ठाउँ नहुने भएकाले एजेण्टबिना हेलिकोप्टरबाट मतपेटिका ढुवानी गर्ने निर्णय भएको प्रमुख जिल्ला अधिकारी पौडेलले बताए ।