म्यादी प्रहरीलाई खानेपानी र शौचालयको समस्या

१ असार, बैतडी – बैतडीमा कार्यरत म्यादी प्रहरीलाई खानेपानी र शौचालयको समस्या भएको छ । सदरमुकाममा खटिएका एक सय म्यादी प्रहरीले पिउने पानीको समेत अभाव भएको गुनासो गरेका छन् ।
नुहाउन र लुगा धुनका लागि दुई किलोमिटर टाढाको नौला (पानीको सानो पोखरी) जाने गरेको म्यादी प्रहरीले बताए ।
पहिले नै पानीको समस्या भइरहेकाले म्यादी पनि थपिएपछि चरम अभाव भएको जिल्ला प्रहरी कार्यालयले जनाएको छ । सदरमुकाम गढीमा रहेको दशरथचन्द नगरपालिकाको पुरानो भवनमा म्यादी प्रहरीलाई राखेको जिल्ला प्रहरी कार्यालयले जनाएको छ ।
त्यहाँ शौचालय भवन भत्काइसकेकोले उनीहरू शौच गर्न नजिकै रहेको मालपोत कार्यालय जाने गरेका छन् । सय जनाले एकै शौचालयको प्रयोग गर्ने भएकाले लामो लाइनमा बस्नुपर्ने बाध्यता रहेको उनीहरूको भनाई छ । सुरुमा मालपोतको पुरानो भवनमा रहेका म्यादी प्रहरीलाई अहिले नगरपालिकाको जीर्ण भवनमा सारिएको छ । महिला म्यादी प्रहरीको लागि गढीमै हल भाडामा लिएर बस्ने व्यवस्था मिलाइएको छ ।